कांग्रेस केन्द्रीय सदस्यमा मधेसी, महिला, दलित र जनजातितर्फको नतिजा

काठमाडौँ,३० फागुन । नेपाली काँग्रेसको १३औँ महाधिवेशनमा केन्द्रीय सदस्यका लागि भएको निर्वाचनको सबै आरक्षणतर्फको मतगणना सकिएको छ ।

महिला, दलित, जनजाति र मधेसीतर्फ आरक्षित कोटाका केन्द्रीय सदस्यहरुको मतगणना आज सकिएको छ भने मुस्लिमतर्फको गणना यसअघि नै सकिएको थियो ।

खुल्ला महिला कोटाबाट छजना निर्वाचित भएका छन् भने दुईजना महिलासहित दलित, मधेसी र जनजातिबाट पाँच–पाँचजना निर्वाचित भएका छन् । मुस्लिममा भने एकजनाको मात्रै कोटा भएकोमा फर्मुल्लाह मन्सुर विजयी हुनुभएको यसअघि नै घोषणा गरिएको छ ।

खुल्ला महिलातर्फ

खुल्ला महिलातर्फ डा डिला सङ्ग्रौला एक हजार ५६४, पुष्पा भुसाल एक हजार २६७, कमला पन्त एक हजार १३०, सरिता प्रसाईं ९८७, अम्बिका बस्नेत ९३७ र ईश्वरी न्यौपानेले ९३५ मत ल्याएर विजयी हुनुभएको छ । महिला कोटामा ३८ जनाको उम्मेदवारी परेको थियो ।

जनजातितर्फ

आदिवासी जनजातितर्फको आरक्षण कोटामा चिनकाजी श्रेष्ठ ९४७, बहादुरसिं लामा ७६७ र कल्याण गुरुङले ७३४ मत प्राप्त गरी निर्वाचित हुनुभएको छ । आदिवासी जनजाति महिलातर्फको कोटामा भने सीता गुरुङ एक हजार २७४ र रत्ना शेरचनले ८४६ मत प्राप्त गरी विजयी हुनुभएको निर्वाचन समितिका सचिव प्रदीप पराजुलीले जानकारी दिनुभयो । आदिवासी जनजातितर्फ तीन केन्द्रीय सदस्य पदका लागि ४० र आदिवासी जनजाति महिलातर्फ दुई पदका लागि १२ जना उम्मेदवार हुनुभएको थियो ।

मधेसीतर्फ

मधेसीतर्फ अजय चौरसियाले एक हजार ३४१, महेन्द्र यादव एक हजार २३६ र रामकृष्ण यादवले एक हजार २०० मत प्राप्त गरी विजयी हुनुभएको छ भने मधेसी महिला कोटाबाट किरण यादव एक हजार ३३६ मत र पार्वता डिसी चौधरी एक हजार १३० मतका साथ निर्वाचित हुनुभएको छ । मधेसी आरक्षणतर्फ तीन पदका लागि १५ र मधेसी महिला दुुई पदका लागि नौजनाको उम्मेदवारी परेको थियो ।

दलिततर्फ

त्यसैगरी, दलिततर्फ केन्द्रीय सदस्यको कोटामा जीवन परियारले एक हजार ४८१, मानबहादुर विश्वकर्माले एक हजार ४०२ र मिन विश्वकर्माले १,३१३ मत ल्याएर विजयी हुनुभएको छ । दलित महिलातर्फ एक हजार ५१९ मत प्राप्त गरी लक्ष्मी परियार र एक हजार ५०२ मत प्राप्त गरी सुजाता परियार केन्द्रीय सदस्य हुनुभएको निर्वाचन समितिले जनाएको छ । दलितको तीन पदका लागि २० जना र दलित महिला दुई पदका लागि पाँचजना चुनावी मैदानमा हुनुहुन्थ्यो ।

खुल्लातर्फको २५ र प्रदेशतर्फको १४ केन्द्रीय सदस्य पदको मतगणना भने अझै सकिएको छैन । खुल्लाका लागि ९० जना र सात प्रदेशबाट दुईजनाका दरले १४ सदस्यका लागि भएको निर्वाचनमा प्रदेश नं १ मा १३, प्रदेश नं २ मा पाँच, प्रदेश नं ३ मा १८, प्रदेश नं ४ मा नौ, प्रदेश नं ५ मा १०, प्रदेश नं ६ मा पाँच र प्रदेश नं ७ मा सातजनाले उम्मेदवारी दिएका थिए ।

केन्द्रीय निर्वाचन समितिका संयोजक राधेश्याम अधिकारीले आगामी सोमबारसम्ममा निर्वाचनको सबै परिणाम सार्वजनिक भइसक्ने अनुमान गरिएको जानकारी दिनुभयो ।

काँग्रेस केन्द्रीय कार्यसमितिमा ६४ पदका लागि भएको निर्वाचनको मतगणना जारी रहेको छ ।

महाधिवेशनमा कुल तीन हजार १६१ मतदाता रहेकामा तीन हजार १४८ मत खसेको थियो । रासस

प्रतिक्रिया दिनुहोस्


बिर्तामोड नगरपालिका १ अतिथि सदन छेऊ झापा
नेपाल

© 2018 All Right Reserved Purwanchal Nationa Daily
DEVELOPED BY appharu.com