काठमाडौं ।
राष्ट्रिय प्रजातन्त्र पार्टी (राप्रपा) को नयाँ अध्यक्षमा युवा नेता राजेन्द्र लिङ्देन विजयी हुनु भएको छ ।
राप्रपा महाधिवेशनका क्रममा हिजो भएको मतदानको आज बिहाज सकिएको मत गणना अनुसार लिङ्देन अध्यक्षमा विजयी हुनु भएको हो । तर औपचारिक घोषणा भने हुन बाँकी नै छ ।
लिङ्देनले करीब २ सय मतले कमल थापालाई पराजित गर्नुभएको बुझिएको छ । लिङ्देनको जितसँगै राप्रपाको नेतृत्व युवा पुस्तामा हस्तान्तरण भएको छ । अन्य पदाधिकारी र केन्द्रीय सदस्यहरुको मत गणना पनि सकिएको छ । तर सवै परिणाम एकै पटक घोषणा गर्ने तयारी गरिएको छ ।
गएराति अबेर सम्पन्न भएको मतदानमा ३ हजार ८ सय ७३ जनाले मत खसालेका थिए । ४ हजार ३ सय ७९ महाधिवेशन प्रतिनिधि मध्ये ५०६ जनाले मतदानमा भाग नलिएको निर्वाचन समितिले जनाएको छ । अध्यक्षमा कागजी मतपत्र तथा अन्य पदाधिकारी र केन्द्रीय सदस्यमा ८६ वटा विद्युतिय मेसिनबाट मतदान भएको थियो ।
यसैबीच अध्यक्षका प्रत्यासी कमल थापाले आफ्नो हार स्वीकार गर्दै लिङ्देनलाई बधाई दिनुभएको छ । थापाले सामाजिक सन्जालमा लेखेका छन्, ‘प्रजातान्त्रिक मूल्य र मान्यता आत्मसात गर्दै राप्रपा अध्यक्ष पदको निर्वाचनमा भएको पराजय सहर्ष स्विकार गर्दछु । नवनिर्वाचित अध्यक्ष राजेन्द्र लिङदेनलाई बधाई तथा शुभकामना ।’