पथरीशनिश्चरे,
भूमी आयोगका केन्द्रीय अध्यक्ष केशव निरौलाले भूमि सम्बन्धि सम्पूर्ण समस्याको एकैसाथ समाधान प्रक्रिया अघि बढाइने बताउनु भएको छ ।
उहाँले शनिबार मोरङको पथरीशनिश्चरे नगरपालिकाम नगरका राजनीतिक दलका प्रतिनिधि सम्मिलित आयोगको सहयोग एवम् समन्वय समितिसङ्ग छलफल गर्ने क्रममा सो कुरा बताउनु भएको हो ।
उहाँले जोतभोग एउटाको र पूर्जा अर्कैको नाममा रहेको र सबै खाले बसोबासका समस्याको समधान प्रक्रिया एकसाथ अघि बढाइने उल्लेख गर्नु भयो। सफ्टवेयरमा दर्ता हुन बाँकी रहेकाको तथ्यांक दर्ता गर्ने र सकिएको ठाँउमा नापी थलिने उहाँको भनाइ छ । उक्त अवसरमा आयोग केन्द्रीय सदस्य सरिता महर्जन र जिल्ला अध्यक्ष सुशीला घिमिरेले तत्काल काम थालिने बताउनु भएको छ ।
अघिल्लो आयोगले गरेको सबै कामको अपनत्व लिदै कम्प्युटर सफ्टवेयरमा दर्ता हुन बाँकी रहेकाहरूको तथ्यांक दर्ता गर्ने सहितका प्रक्रिया अघि बढाइने जनाउनु भयो । छलफलमा, नगर प्रमुख दिलीपकुमार राई, नगर उपप्रमुख यमुना विष्ट वास्तोला सहित जनप्रतिनिधि, दलका प्रतिनिधिहरूले लामो समयदेखि समस्याको रूपमा रहेको भूमि समस्याको दिगो र न्यायोचित समाधानका लागि निरन्तर सहयोग पुर्याउने बताउनु भयो ।
आइतबारदेखि काम थाल्ने भन्दै आयोगले १ जना सर्भेक्षक र २ जना अमिनको व्यवस्थापन गरिसकेको उल्लेख गरेको छ । नगरले भोलिबाट सफ्टवेयरमा दर्ता हुन बाँकी रहेकाको तथ्यांक दर्ता गर्ने प्रक्रिया थाल्ने भएको छ ।
