काठमाडौँ,
कोरोना भाइरसको सङ्क्रमण आज ८२ जनामा देखिएको छ । स्वास्थ्य तथा जनसङ्ख्या मन्त्रालयले आज सार्वजनिक गरेको बुलेटिनमा छ हजार १७५ जनामा कोरोना परीक्षण गर्दा ८२ जनामा सङ्क्रमण देखिएको छ ।
मन्त्रालयका अनुसार सक्रिय सङ्क्रमितको सङ्ख्या चार हजार ५७४ जना रहेका छन् । पछिल्लो समय २१३ जना कोरोनाबाट निको भएर घर फर्किएका छन् ।
योसँगै निको हुनेको सङ्ख्या नौ लाख ६१ हजार ५६१ पुगेको छ । निको हुने दर ९८.३ प्रतिशत रहेको मन्त्रालयले जनाएको छ । आज सङ्क्रमणबाट कसैको पनि निधन भएको छैन ।
मन्त्रालयका अनुसार २०० भन्दाबढी सङ्क्रमित भएका जिल्लामा ललितपुर, काठमाडौँ, चितवन, कास्की र बाँके रहेका छन् । शून्य सङ्क्रमित भएको चार जिल्ला मनाङ, रुकुमपूर्व, बाजुरा र जुम्ला रहेका छन् । नेपालमा सङ्क्रमण दर १७.८ प्रतिशत रहेको छ । हाल होम आइसोलेसनमा चार हजार ४९८ ,संस्थागत आइसोलेसनमा ७६, आइसियुमा ३१ र भेन्टिलेटरमा छ जनाको उपचार हुँदैछ । विगत २४ घण्टामा आज एक लाख पाँच हजार ४२२ जनाले खोप लगाएका छन् ।