काठमाडौं,
सोमवार बसेको मन्त्रिपरिषद्को बैठकबाट चलचित्र विकास बोर्डको अध्यक्ष पदमा नियुक्त भएका अभिनेता, निर्माता तथा निर्देशक भुवन केसीले पदभार सम्हालेका छन् । उनले बुधवार विहान चावहिलमा अवस्थित बोर्डको कार्यालय पुगेर पूजाआजासहित पदभार ग्रहण गरेका हुन् । सुटबुटमा ठाटिएर पुगेका उनले बोर्डको इतिहासमा पहिलो पटक पूजाआजा पश्चात् पदभार सम्हालेका हुन् ।
पदभार सम्हाल्दै अध्यक्ष केसीले चाँडै फिल्म सम्बद्ध संघ-संस्था, फिल्मकर्मी, पत्रकार र दर्शकहरुको उपस्थितिमा भव्य गोलमेच सम्मेलन गर्ने घोषणा गरे । उनले भने, ‘एक-दुई दिनमा नै बोर्डको बैठक बसेर गोलमेच सम्मेलनको प्रस्ताव तारित गर्नेछौं । जसमा प्राविधिकदेखि कलाकारसम्मको उपस्थिति रहनेछ । त्यहाँबाट फिल्म क्षेत्रको समस्या र त्यसलाई समाधान गर्ने उपाय खोज्नेछौं ।’
४० वर्षको करिअरमा आफूले नेपाली फिल्म क्षेत्रका धेरै समस्याहरु देखेकाले त्यसलाई समाधान गर्न प्रयास गर्ने उनले प्रतिवद्धता व्यक्त गरे । सरकारले आफ्नो योगदानको मुल्यांकन गरेर अध्यक्षको जिम्मेवारी दिएको बताउँदै उनले अगाडि भने, ‘म अग्रजलाई सम्मान र अनुजलाई प्रोत्साहन गर्न आएको हुँ । म आफ्नो कार्यकालमा तन, मन, वचन र सबैलाई साथमा लिएर नै काम गर्नेछु ।’
कांग्रेस प्रवेश गरेकै कारण उनले बोर्ड अध्यक्ष पाएको भन्दै टिका-टिप्पणीहरु पनि भइरहेको छ । यसविषयमा उनले फिल्म क्षेत्रको हकहितका लागि आफू जहाँ जान पनि तयार रहेको तर्क गरे । ‘म जहाँ गए पनि फिल्म क्षेत्रको विकासका लागि जान्छु । मेरो सपना नै फिल्म क्षेत्रको विकास गर्नु हो,’ भुवनले थपे, ‘यदी म एकजना शहिद भएर हाम्रो फिल्म क्षेत्र राम्रो हुन्छ भने मलाई स्वीकार्य छ ।’
उनी बोर्ड अध्यक्षको जिम्मेवारीमा आफूलाई असफल हुने अधिकार नभएको पनि स्वीकार गर्छन् । ‘फिल्मकर्मी र दर्शकहरुलाई मप्रति ठूलो विश्वास र आशा छ । फिल्मकर्मीहरुले भोगेका दुःख अहिलेसम्म ज्यूँकात्यूँ रहेकाले मबाट त्यो कुरा परिपूर्ति हुन्छ भन्ने विश्वास राख्नु स्वभाविक हो । यसकारण मलाई काम गरेरै देखाउनु पर्ने चुनौती छ भन्ने महशुस गरेको छु,’ अध्यक्ष केसीले भने ।-फिल्मीखबर,
