उत्तरी मोरङको पथरीशनिश्चरे नपा वडा नं. १०, जिरिखिम्तीलाई आफ्नो कर्मक्षेत्र बनाएका यूवा लेखक तथा पुस्तकाकार दिपेन्द्र तिमिल्सिना मोरङको मोरङ्ग जिल्लाका लागि नौलो नाम होइन । पथरीशनिश्चरे नगर क्षेत्रमा केही वर्ष देखि व्यापार–व्यवसायमा संलग्न रहेकालेखक दीपेन्द्रले विगत १ दशकदेखि किताव लेखन र प्रकाशनलाई निरन्तरता दिदैं आएका छन्।
उनले ‘टेलिफोन डायरी २०६८’ देखि पछिल्लो पुस्तक ‘मोरङका जनप्रतिनिधि संगालो २०७९’ निकाल्न अहोरात्र खटिनुभएका तिम्सिनाले ९ वटा पुस्तक प्रकाशन गरिसकेका छन् ।आज उनै लेखक तिम्सिनासँग विभिन्न सवाल, विषयवस्तु र सेरोफेरोमा रहेर गरिएका संवादका प्रमुख अंशहरू:
आजकाल के गर्दै हुनुहुन्छ ?
–उही त हो नि ! किताब निकाल्नतिर लागेको छु । सबै पाठकको हातहातमा थमाउन कहिले प्रेस र कहिले संकलन गर्ने कार्यमा अभ्यस्त छु ।
किताव लेखन, संकलन र प्रकाशन गर्दै हुनुहुन्छ नि ! कस्तो अनुभूति गर्नुभएको छ ?
– हेर्नुस्– किताब निकाल्न पक्कै पनि गाह्रो हुन्छ नै । डाटा संकलन गर्न जानुपर्छ, सम्बन्धित व्यक्तिलाई भेट्नुपर्छ । कहिले भेट हुँदैन । कहिलेकाहिँ भेट गर्न गाह्रो हुन्छ । पटकपटक धाउनुपर्छ । एउटा किताब बनाउन त्यति सजिलो छैन । यो काम चानचुने होइन । किताब लेखन, संकलन र प्रकाशनको काम अत्यन्तै गाह्रो काम हो । त्यहिँ काममा निरन्तर लाग्दा चाहिँ सफलता मिल्दो रहेछ ।
किताव प्रकाशनको आर्थिक अवस्थालाई कसरी जोहो गर्नुहुन्छ ?
–किताव प्रकाशन गर्दा समस्या पर्छ । सबैभन्दा पहिला प्रेसमा एकमुष्ट पैसा बुझाउँदा ऋण काडेर बुझाएको छु । प्रेसको छपाई खर्च स्वयंले व्यहोरेको छु । अहिलेसम्म किताब छपाउँदा मलाई ऋण नै परेको छ । धेरै दुःखका साथ मैले किताव छपाएको छु । यो समस्या मलाई मात्र थाहा छ । मेरो बलबुत्ताले भ्याएसम्म किताब निकालेको छु, निकाल्ने प्रयत्नमा छु ।
यस्तो दुःख गरेर पनि प्रतिफल प्राप्त गर्ने आशा कत्तिको राख्नुभएको छ नि ?
–दुःखको प्रतिफल, नाफा वा घाटाभन्दा पनि मैले छपाएको कितावको लगानी उठोस् भन्ने हो । यसमा पनि भोलि गएर भावी पुस्ताका लागि मैले तयार पारेको दस्तावेज पाठ्यसामाग्री बन्छ भन्ने हो । देश र समाजका लागि केही होस् भन्ने चाहना पनि हो । अहिलेका प्रकाशन आउँदो पुस्ताका लागि ऐतिहासिक महत्व बोकेको पाठ्यसामग्री हो । मनभित्र किताव बनाउने र समाजका लागि उत्प्रेरणा दिन तिब्र अभिलाषा थियो । यसर्थ, यो कार्यमा म पूर्णतः सन्तुष्ट छु ।
सम्बन्धित पालिकाबाट के – कस्तो सहयोग पाउनुभएको छ ?
– म बसेको पथरीशनिश्चरे पालिकाबाट अहिले सम्म ठिकै साथ र सहयोग पाएको छु । यसमा ‘मोरङका जनप्रतिनिधि संगालो २०७९’ को प्रकाशनबाट सहयोग पाउने आशा गरेको छु । त्यस्तै, अन्य १७ वटा पालिकाबाट पनि सहयोग पाउने अपेक्षा लिएको छु ।
‘मोरङका जनप्रतिनिधि संगालो २०७९’ निकाल्नुको औचित्य के हो ?
–‘मोरङका जनप्रतिनिधि संगालो २०७९’ निकाल्नु भनेको यहाँको ऐतिहासिक दस्तावेज तयार पार्नु हो । यसले समयक्रममा दस्तावेजको काम गर्छ भन्ने लाग्छ । यसमा पनि मोरङमा २०१५ सालदेखि २०७४ सालसम्मका निर्वाचित सांसदहरू, २०४९ सालदेखि ०७९ सालसम्मको निर्वाचित जनप्रतिनिधिको डाटासहितको सामाग्री प्रकाशित नभएकोले यसको गहिरो खोज अनुसन्धान गरी प्रकाशन गरेको छु ।
तपाईले यस अघि ६३ वर्ष जेसीज दस्तावेज ऐतिहासिक पुस्तक तयार गर्नुभएको छ नि ! यो कस्तो दस्तावेज हो ?
–१ सय ६१ वटा जेसीज शाखाको संस्थापक अध्यक्षदेखि सन् २०२१ सम्मका अध्यक्षहरू समावेश यस पुस्तकमा छन् । त्यसैगरि , नेपाल जेसीजका संस्थापक अध्यक्षदेखि सन् २०२१ सम्मका राष्ट्रिय अध्यक्षहरू, उपाध्यक्षहरू र कार्यकारिणी उपाध्यक्ष सहित जेसिसअाई विश्वका संस्थापकदेखि सन् २०२१ सम्मका विश्वका अध्यक्षहरूको बारेमा समाविष्ट यस दस्तावेजमा समेटिएको छु ।
अन्त्यमा केही भन्नु छ ?
–वर्तमान अवस्थामा खोज अनुसन्धान गर्ने कार्य घटेको छ । हामीले यस्ता कुरा खोजी गरी दस्तावेज बनाउन सके भोलिको पुस्तालाई इतिहास बुझ्न सरल र सहज नै हुन्छ । त्यसमा वर्तमान तथ्यांकहरूमा अहिले विकासमा पनि टेवा पुग्छ । स्थानीय तहहरूलाई यस्ता तथ्यांक अत्यन्तै महत्त्वपूर्ण दस्तावेजहरू रहन्छन् । अन्त्यमा, मेरा विचारहरू प्रकाशन तथा सम्प्रेषण गरिदिनुभएकोमा हार्दिक आभार प्रकट गर्दछु ।-प्रस्तुति: छविराज ढकाल
