मोरङ।
नेटवर्किङमार्फत व्यावसाय सञ्चालन गरिरहेको ग्लोबल ओरियन्सको सुनसरी इटहरीस्थित शाखा कार्यालबाट प्रहरीले ६ जनालाई पक्राउ गरेको छ ।
कमाई राम्रो हुने र विदेश घुम्न पाइने लोभ देखाएर सर्वसाधारणलाई सदस्य बनाउँदै ठगी गरेको आरोपमा प्रहरीले ग्लोबल ओरियन्स नेपालको इटहरी शाखाबाट छ जनालाई मंगलबार पक्राउ गरेको हो ।
इलाका प्रहरी कार्यालय इटहरीका प्रहरी निरीक्षक भीमबहादुर खड्काका अनुसार पक्राउ पर्नेमा मोरङ मिक्लाजुङ–१का ससिता राई, सुन्दरहरैंचा–७का सञ्जीव माझी, ग्रामथान–३का बिक्रम माझी, कटहरी–६ का पंकजकुमार साह र अरुणकुमार मुडयारी र झापा बिर्तामोड–१०का पदम राईलाई पक्राउ गरेको हो ।
इटहरी–९ सजन राईको घरमा कोठा भाडामा लिएर उनीहरुले ग्लोबल ओरियन्स नेपाल प्रालिको बोर्ड पनि राखेको प्रहरीले जनाएको छ ।
प्रहरीले पक्राउ परेकाहरुको कोठामा खानतलासी गर्दा कम्प्यूटर, ल्यापटप, मोवाइल फोन, विभिन्न व्यक्तिहरुको फोटो, नागरिकता, सम्झौता–पत्र, टिकट, बील, छाप, मेडल, प्रमाणपत्रलगायतका सामग्री बरामद गरेको छ ।
पक्राउ परेका ६ जनाबिरुद्ध सुनसरी जिल्ला अदालतबाट नेटवर्किङ्ग ठगी मुद्दामा म्याद थपेर अनुसन्धान शुरु गरिएको प्रहरीले जनाएको छ ।