सिर्जना बाल युवा क्लबमा निर्माण भएका योजनाहरुको उद्घाटन

अर्जुनधारा,‘पूर्वाधार निर्माण कार्यक्रम–२०७९’ अभियान अन्र्तगत झापाको अर्जुनधारा–७ ज्योति बस्तीस्थित सिर्जना बाल युवा क्लबमा निर्माण सम्पन्न भएका योजनाहरुको बिहीबार एक कार्यक्रमकोबिच उद्घाटन एवम् हस्तान्तरण गरिएको छ ।
क्लबकी अध्यक्ष एवम् अभियानकी सचिव शर्मिला न्यौपानेको अध्यक्षतामा आयोजित उक्त कार्यक्रममा प्रमुख अतिथि अर्जुनधारा नगरपालिकाकी प्रमुख प्रशासकीय अधिकृत गीताकुमारी राईले कार्यक्रमको ‘फोटोलेख’ अनावरण गर्दै उद्घाटन गरेकी थिइन् ।
गत कात्तिक २२ गतेदेखि सुरु भएको अभियान अन्र्तगत २२ जना अभियन्ताको सहयोगमा पक्की शौचालय निर्माण, खानेपानीको लागि कल जडान, विद्युत लाइन विस्तार, एक थान स्टील दराज, एक थान फलामको टेबल र १० थान प्लाष्टिकको कुर्सी प्राप्त भएको अभियानका संयोजक एवम पूर्वाञ्चलकर्मी अमित खम्बूले जानकारी दिए ।
त्यसैगरी कार्यक्रममा अभियानकी सचिव न्यौपानेले अभियानको आय–व्यय विवरण सार्वजनिक गरेकी थिइन् । प्रस्तुत विवरण अनुसार जिन्सी र नगदसहित जम्मा आम्दानी एक लाख ८५ हजार पाँच रुपैयाँ, जम्मा खर्च एक लाख ८२ हजार दुई सय रुपैयाँ र जम्मा बचत दुई हजार आठ सय पाँच रुपैयाँ रहेको छ ।
सोही कार्यक्रममा अभियन्ता मीना राईले क्लबलाई एक थान फुटबल र एक थान भलिबल प्रदान गरेकी थिइन् । उक्त कार्यक्रमको सञ्चालन अभियानका संयोजक खम्बूले गरेका थिए ।