काठमाण्डाौं ।
गौतम बुद्धको जन्मस्थल लुम्बिनीमा रहेको चिनियाँ गुम्बाले सिंगो मायादेवी मन्दिर परिसरमा कब्जा जमाएको भन्दै चौतर्फी आलोचना सुरु भएको छ ।
बिहीबार केही समयका लागि दीप प्रज्वलनको अनुमति लिएर चिनियाँ गुम्बाले सिंगो मायादेवी मन्दिर परिसर नै छेकिने गरी बडेमानको स्टेज र बोर्ड राखेको भन्दै लुम्बिनी विकास कोषका केही पदाधिकारीले नै असन्तुष्टि जनाएका छन् ।
कोषका सदस्य सचिव सानुराजा शाक्यले दीप प्रज्वलन कार्यक्रमको अनुमति लिएर चिनियाँ गुम्बाले स्टेज बनाएको जानकारी दिए । उनले दुई घण्टाका लागि मात्र अनुमति लिएको बताए । उनले भने, ‘हामीसँग कार्यक्रम गर्न अनुमति लिइएको हो । स्टेज बनाउन अनुमति लिएको होइन । यति ठूलो स्टेज बनाउने कुरा भएको थिएन । जम्मा दुई घण्टाका लागि हो ।’
युनेस्को विश्व सम्पदा सूचीमा रहेको मायादेवी मन्दिर परिसरमा हाल सयौंको संख्यामा चिनियाँहरूको बाक्लो चहलपहल छ । बुद्ध जयन्तीको अवसरमा आयोजना हुन लागेको एक कार्यक्रममा सहभागी हुन चीनबाट चिनियाँ धार्मिक तथा साँस्कृतिक संगठनका महासचिव हान सोङ बुधबार नै काठमाडौँ आइपुगेका थिए ।
उनी ११ जना प्रतिनिधिमण्डलको जम्बो टोली लिएर क्याथे प्यासिफिकको उडानबाट बुधबार अबेर काठमाडौँ आएका हुन् । लुम्बिनीमा आयोजना हुने उक्त कार्यक्रममा चिनियाँ प्रतिनिधिसहित प्रधानमन्त्री पुष्पकमल दाहाल प्रचण्ड र संस्कृति पर्यटन तथा नागरिक उड्डयनमन्त्री सुदन किराँती पनि सहभागी हुने तय भएको छ ।
विश्लेषकहरुले भने कुनै धर्म नै नमान्ने कम्युनिष्ट पार्टीको सरकार रहेको चीनले नेपालमा आयोजना हुने धार्मिक गतिविधिमा देखाएको चासोप्रति संशय जनाएका छन् । केही जानकारहरु भने नेपालमा आफ्नो आर्थिक एवम् साँस्कृतिक प्रभाव विस्तार गर्न चीनले बौद्ध धर्मको उपयोग गरिरहेको बताउँछन् ।
नाम उल्लेख नगर्ने सर्तमा परराष्ट्र मामिलाका एक जना जानकारले भने, ‘यस्ता कार्यक्रम र रणनीतिबारे नेपालीले चासो देखाउने बेला भएन र ?’
