बिर्तामोड, दोस्रो मिस्टर कञ्चनजंघा बडी बिल्डिङ च्याम्पियनसीपको उपाधि दिलीपकुमार चौधरीले जितेका छन् ।
कोशी प्रदेश खेलकुद विकास बोर्डको मुख्य आयोजना तथा बडी ग्यारेज बिर्तामोडको संयोजनमा सम्पन्न च्याम्पियनसीपको प्रतिस्पर्धामा ओभरलमा ६५ किलो तौल समूहका चौधरीले उपाधि हात पारेका हुन् । उनले नगद तीन लाख ११ हजार एक सय ११ रुपैयाँ हात पारे । उनी डिएनपी फिटनेस गाइघाटबाट सहभागी भएका हुन् ।
त्यस्तै प्रतियोगितामा ७० किलो तौल समूहबाट केज टोटल फिट्नेस इलामका सनम लिम्बू दोश्रो, ७० किलो तौल समूहबाटै धरान फिट्नेसका सन्दीप गिरी तेश्रो, ५५ किलो तौल समूहबाट उर्लाबारीका धर्मराज खापुङ चौथो र ७० किलो तौल समूहबाट नेपाल पुलिस क्लव हेटौंडाका अजय मल्लिक पाँचौं भएका छन् । उनीहरुले क्रमशः दुई लाख ५० हजार, एक लाख ५० हजार, एक लाख र ७५ हजार रुपैयाँका साथै मेडल, ट्रफी र प्रमाण पत्र प्राप्त गरेका छन् ।
तौल समूह अन्तर्गत ५५ किलो तौल समूहमा धर्मराज खापुङ पहिलो, प्रवित राजवंशी दोश्रो र दिवश श्रेष्ठ तेश्रो भए । त्यस्तै ६० किलो तौल समूहमा अजय मल्लिक पहिलो, विनोद कार्की दोश्रो र युवराज बस्नेत तेश्रो भएका छन् ।
त्यसैगरी ६५ किलो तौल समूहमा दिलीपकुमार चौधरी पहिलो, हर्कबहादुर राई दोश्रो र ओशन कार्की तेश्रो भए । त्यस्तै ७० किलो तौल समूहमा सनम लिम्बू पहिलो, मदनकुमार योङहाङ दोश्रो र सागर राई तेश्रो भएका छन् ।
७० किलो माथिको तौल समूहमा भने दुई जना मात्रै सहभागी थिए । शुक्रबार सम्पन्न प्रि जजिङमा तीन जना सहभागी भए पनि एक जना खेलाडी कोशी प्रदेश बाहिर भएको कारण आउट भएका थिए । बाँकी रहेका दुई जनामध्ये सन्दीप गिरी पहिलो र प्रशिद्व भक्त राई तेश्रो भएका छन् ।
विजेताहरुलाई कोशी प्रदेश खेलकुद विकास बोर्डका सदस्य सचिव हंसराज वाग्ले, सहारा नेपाल साकोसका कार्यकारी निर्देशक महेन्द्र गिरी, जिल्ला खेलकुद विकास समिति झापाका अध्यक्ष प्रशान्त भण्डारी, आयोजक समितिका अध्यक्ष अर्जुन मैनाली, कार्यक्रम संयोजक राम दाहाल लगायतले पुरस्कार प्रदान गरे । समूहगत रुपमा दोस्रो र तेस्रो हुने खेलाडीलाई पनि जनही १० हजार र पाँच हजार रुपैयाँ पुरस्कार प्रदान गरिएको थियो ।
