शिवसताक्षीमा वडाको सिलिङ बजेटमा विवाद

0
57

शिवसताक्षी ।

झापाको शिवसताक्षी नगरपालिकाले चालू वर्षको तुलनामा आगामी आथिक वर्षको वडा सिलिङ बजेट घटाएको भन्दै नगरका पाँच वडाध्यक्षले आपत्ति जनाएका छन् ।

आफूहरुलाई पाखा लगाएर नगर प्रमुख मेघाहाङ थोप्राले एकलौटी वडा सिलिङ बजेट निर्धारण गरेको भन्दै उनीहरुले आपत्ति जनाएका हुन् । चालू आर्थिक वर्षमा नगरले वडामा ७५ लाख वडा सिलिङ बजेट विनियोजन गरेको थियो । उक्त बजेटद्वारा सञ्चालित योजना निर्माण सम्पन्नको अन्तिम चरणमा छन् । आगामी आर्थिक वर्ष ०८०/०८१मा वडा सिलिङ बजेट ६० लाख मात्र विनियोजन गर्ने विषयले आफूहरुको गम्भीर ध्यानाकर्षण भएको भन्दै नगर प्रमुख थोप्रालाई वडाध्यक्षले आइतबार ज्ञापन–पत्र बुझाएका छन् ।

नगर प्रमुखको कार्यकक्षमा पुगेर वडा नम्बर ३का वडाध्यक्ष भाष्कर न्यौपाने, वडा नम्बर ६का मनोज खुलाल, ७ का भवानी चेम्जोङ, ८का सन्तकुमार फेउदिन र वडा नम्बर ९ का डिल्ली फेम्बूले हस्ताक्षर गरेको ज्ञापन–पत्र संयुक्त रुपमा बुझाएका थिए । वडाध्यक्षले ज्ञापन–पत्रमा संघीय तथा प्रदेश सरकारबाट स्थानीय सरकारको खर्चको आवश्यकता, पूर्वाधार निर्माणको अवस्था, राजश्व संकलनको क्षमता लगायतका आधारमा प्राप्त हुने वित्तीय समानीकरण अनुदान तथा आन्तरिक आयको न्यायोचित तथा विवेकपूर्ण बाँडफाँट हुनुपर्नेमा जोड दिए ।

शिवसताक्षी नगरपालिकाले आगामी आ.व. २०८०/०८१को बजेट तथा कार्यक्रम तयार गर्ने क्रममा वडाहरुलाई सिलिङ्ग बजेट रु. ६० लाख मात्र उपलब्ध गराएको वडाध्यक्षले गुनासो गरेका छन् । जेठ २४ गते पालिकाबाट गएको इमेलको पत्रवाटमात्र आफूहरुलाई वडा सिलिङ बजेट तय भएको बारे जानकारी भएको वडाध्यक्ष भवानी चेम्जोङले बताए ।

वडा बजेट सिलिङ्ग निर्धारण तथा नगरको योजनाहरुमा बजेट विनियोजन गर्दा विगतमा नगर कार्यपालिकाको बैठकको निर्णयवाट हुने परम्परालाई नगर प्रमुख थोप्राले लत्याएको वडाध्यक्षले आरोप लगाएका छन् । ‘हामी वडा अध्यक्षसँग नगर प्रमुखले सामान्य परामर्श समेत नगरी नगरपालिकामा अघोषित सिन्डिकेट लगाउनु भएको हामीले ठहर गरेका छौं, यो हामीलाई मान्य छैन’– वडाध्यक्ष डिल्ली फेम्बूले भने । कार्यपालिकाको बैठकपछि ५७ जनाको नगरसभाले अनुमोदन गर्ने बजेटमा नगर प्रमुखले ५–६ जना कोठामा राखेर तयार गरिएको बजेट आफूहरुलाई कुनै हालतमा मान्य नहुने ९ नम्बर वडाका अध्यक्ष फेम्बूले बताए ।
नगरको श्रोत अनुमान तथा बजेटको सीमा निर्धारण समितिको बैठकले योजनाहरुमा विनियोजन गरेको बजेटमा नगरको महत्वपूर्ण गौरवका योजनाहरु ल्याण्डफिल्ड साइट सञ्चालन, शिवगञ्ज कृषिथोक बजार निर्माण, झिलझिले वस पार्क निर्माण, शिवगञ्ज आधारभूत अस्पताल सञ्चालन तथा कृषि क्षेत्रको अग्रगामी विकास वारेमा कहीँकतै बजेटले सम्बोधन नगरेको वडाध्यक्षले आरोप लगाएका छन् । यस्ता अनिवार्य भौतिक पूर्वाधारमा बजेट विनियोजन नगरी सीमित व्यक्तिहरुलाई लाभ हुने गरी बजेट विनियोजन गरेको वडाध्यक्षको आरोप छ । उनीहरुले भने– ‘नगरको सुशासन तथा चौतर्फी विकासमा अवरोध सिर्जना हुने, प्रकृतिको श्रोत अनुमान तथा वजेटको सीमा निर्धारण समितिको निर्णय सच्याउन माग गर्दछौं ।’

वडा–वडाको विकासबाट नै नगरको विकास हुने तथा वडा क्षेत्र बाहेक नगरको अन्य कुनै भूगोल नहुने भएको कारणले वडा कार्यालयमा बढीभन्दा वढी वजेट प्रवाह हुने पर्नेमा उनीहरुको जोड छ । वडा कार्यालयहरुलाइ अपाङ्ग बनाउने किसिमको वजेट सिलिङ्ग प्राप्त भएकोले वडाको विकास जस्तो गम्भीर विषयमा लापरबाही नगर्न वडा अध्यक्षले नगर प्रमुखको ध्यानाकर्षण गराएका छन् । नगर प्रमुखले कार्यपालिकाको वैठक नराखी जबरजस्ती अघि बढ्ने कार्य भएमा आगामी दिनमा नगरको गतिविधि र योजना तर्जुमा तथा कार्यान्वयनमा सहभागी नहुने र त्यसवाट पर्न सक्ने असर तथा परिणामको जिम्मेवारी स्वयम्ले लिनुपर्ने वडाध्यक्षले ज्ञापन–पत्रमा उल्लेख गरेका छन् ।

झापा जिल्लाका अन्य नगरपालिका र गाउँपालिकाहरुले वडाको बजेट सिलिङ्ग वर्षेनि क्रमशः बढाउँदै लगेका उदाहरणहरु छन् । वडाहरु सक्षम तथा सवल भएमा मात्र सम्पूर्ण नगर विकसित तथा समृद्ध हुने तथ्यको विपरीत शिवसताक्षी नगरकार्यपालिका अघि बढेको वडाध्यक्षले आरोप लगाएका छन् । ‘वडाको सिलिङ बजेट घटाउने कार्यमा जिम्मेवार व्यक्ति अघि बढेमा वडाको विकासमा वाधा उत्पन्न हुने ठहर गर्दै उक्त निर्णय सच्याउन माग गर्दछौं’– ज्ञापन पत्रमा भनिएको छ । वडाध्यक्षले नगर प्रमुखले ४८ घण्टाभित्र नगर कार्यपालिकाको वैठक आव्हान गरी आगामी आ.व. २०८०÷०८१को वजेट तथा अन्य विषयहरुमा अर्थपूर्ण छलफलको माग गरेका छन् ।

यसैबीच नगर प्रमुख थोप्राले वडाध्यक्षले बुझाएको ज्ञापन पत्र बुझ्दै श्रोत अनुमान तथा बजेटको सीमा निर्धारण समितिले ल्याएको खेस्रालाई कार्यपालिका बैठकमा पेश गर्ने बताए । उनले भने– ‘नगरसभाका लागि पनि कार्यपालिका बैठक बोलाउनु छ । त्यही बैठकमा यो विषयलाई छलफलका रुपमा लैजाउँला ।’

शिवसताक्षी नगरमा ११ वटा वडा छन् । ज्ञापन–पत्रमा ५ जना वडाध्यक्षको मात्र हस्ताक्षर छ । अन्य ६ जना वडा अध्यक्षले वडा सिलिङ बजेटमा कुनै प्रतिकृया दिएका छैनन् । नगरका ५ वटा वडामा नेकपा एमाले निर्वाचित भएको छ भने एकवटा वडामा माओवादीले बिजय हासिल गरेको थियो । अन्य ५ वटा वडामा नेपाली कांग्रेसले विजय हासिल गरेको थियो । नगर प्रमुख र उपप्रमुख पनि नेकपा एमालेबाट निर्वाचित भएका हुन् । ज्ञापन–पत्र बुझाउने नेपाली कांग्रेसबाट निर्वाचित वडाध्यक्ष हुन् ।

LEAVE A REPLY

Please enter your comment!
Please enter your name here