ताइपेई (ताइवान),
ताइवानले बुधबार चीनले आफ्नो सीमा नजिक ४३ वटा लडाकु विमान र सात नौसैनिक जहाज पठाएको जनाएको छ । हालैको यो घटनापछि चीनले ताइवानमाथि दबाब दिने रणनीतिमा रहेको छ ।
ताइवानको रक्षा मन्त्रालयले बुधबार बिहान ६ बजे समाप्त भएको २४ घण्टाको अवधिमा चीनले यी लडाकु विमान र नौसैनिक जहाज आफ्नो सीमातर्फ पठाएको जनाएको छ। मन्त्रालयले ती मध्ये 37 विमानहरूले ताइवान स्ट्रेटमा मध्य रेखा पार गरेको बताएको छ, जसलाई चीनले अनौपचारिक सीमा मान्दैन।
मन्त्रालयले जवाफमा ताइवानले आफ्ना लडाकु विमान र नौसेना जहाज पठाएको र मिसाइल प्रणाली सक्रिय गरेको बताएको छ। सन् २०२२ को अगस्टमा अमेरिकी प्रतिनिधि सभाका तत्कालीन सभामुख न्यान्सी पेलोसीको ताइवान भ्रमणपछि चीनले आक्रामक अडान अपनाइरहेको छ। ताइवानको भ्रमणप्रति असन्तुष्टि जनाउँदै चीनले अमेरिकासँगको सैन्य वार्ता स्थगित गरेको थियो । ताइवान एक स्वशासित टापु हो जसलाई चीनले आफ्नो भाग मान्दछ। चीनले आवश्यक परे बल प्रयोग गरेर ताइवानलाई आफ्नो नियन्त्रणमा ल्याउन सक्ने बताएको छ ।
यसैबीच, अमेरिकी राष्ट्रपति जो बाइडेनले यसै महिनाको अन्त्यमा सान फ्रान्सिस्कोमा हुने ‘एपेक (एसिया-प्यासिफिक इकोनोमिक कोअपरेसन) नेतृत्व’ शिखर सम्मेलनमा आफ्ना चिनियाँ समकक्षी सी जिनपिङसँग भेट गर्नेछन्। ह्वाइट हाउसले यसको पुष्टि गरेको छ । मंगलबारको दैनिक पत्रकार सम्मेलनमा सानफ्रान्सिस्कोमा बाइडेन–सी भेटवार्ताका बारेमा सोध्दा ह्वाइट हाउसका प्रेस सचिव करिन जीन पियरेले भनिन्, ‘राष्ट्रपति यसका लागि पर्खिरहेका छन् ।’ भारतीय प्रधानमन्त्री नरेन्द्र मोदीलाई पनि निम्तो दिइएको छ ।
