झापा ।
सभामुखका स्वकीय सचिव एवम् योजना तर्जुमा विज्ञ केशवराज ढुंगेलले ४० लाख रुपैयाँ विनियोजन गरिएको अर्जुनधारा नगरपालिकाको आवधिक नगर विकास योजना निःशुल्क निर्माण गर्नुभएको छ ।
अर्जुनधारा नगरपालिकाले ४ मंसिरमा आयोजना गरेको कार्यक्रममा सभामुख देवराज घिमिरेले अर्जुनधारा नगरपालिकाको आवधिक नगर विकास योजना सार्वजनिक गर्नुभयो । नगर विकास योजना सार्वजनिक कार्यक्रममा ढुंगेलले आर्थिक वर्ष २०७९/८० मा योजना निर्माणका लागि ४० लाख रुपैयाँ विनियोजन गरे पनि आफूले निःशुल्क निर्माण गरेको जानकारी दिनुभयो ।
‘नगरपालिकाले नगर विकास योजना निर्माणका लागि विगत २/३ वर्षदेखि हरेक वर्ष बजेट विनियोजन गरे पनि काम हुन सकेको थिएन,’ उहाँले भन्नुभयो, ‘६ महिनाको अथक प्रयासपछि कार्ययोजना नगरपालिकालाई हस्तान्तरण गरेको छु ।’
ढुंगेल नेतृत्वको कञ्चनजंघा परामर्श सेवा प्रा.लि.ले देशभरका विभिन्न स्थानीय तहमा नीति तथा कार्ययोजना निर्माण गर्दै आएको छ । उहाँले आवधिक योजनाहरु तयारी गर्ने तर कार्यान्वयनमा नलैजाने प्रवृत्ति देखिएको भन्दै अर्जुनधारा नगरपालिकाले भने कार्यान्वयनका लागि तदारुकता देखाउने विश्वास व्यक्त गर्नुभयो । उहाँले नगरपालिकाका समस्या तथा चुनौतीलाई सुक्ष्मरुपमा विषयगत र क्षेत्रगत रुपमा विश्लेषण गरिएको बताउँदै सम्भावना र अवसरहरुको सबै क्षेत्रबाट खोजी गरेको जानकारी दिनुभयो ।
नगरबासी भएको हैसियतले सामाजिक उत्तरदायित्व वहन गर्दै आफूले योजना तयार पारेर नगरलाई प्रदान गरेको ढुंगेलको भनाइ छ । अर्जुनधारा नगरपालिकाको आवधिक नगर विकास योजना सार्वजनिक गर्दै सभामुख घिमिरेले आगामी दिनमाविकास योजना बनाउन सहयोगी हुने विश्वास व्यक्त गर्नुभयो ।
उहाँले स्थानीय तहमा विभिन्न योजनाहरु निर्माणको लहर चले पनि कार्यान्वयनमा चासो नदेखाइएको बताउँदै अर्जुनधाराले भने कार्यान्वयनतर्फ पाइला चाल्ने विश्वास व्यक्त गर्नुभयो । नगर प्रमुख बलदेव सिंह गोम्देन तामाङले आवधिक योजनालाई केन्द्रमा राखेर दीर्घकालीन लक्ष्य, नतिजा, रणनीति तथा प्राथमिकताहरु तय गरिने जानकारी दिनुभयो । उहाँले हरेक वर्षको वार्षिक नीति तथा कायृक्रम र बजेट आवधिक योजनामा आधारित हुने बताउनुभयो ।
उहाँले नगरले आवधिक योजनाकालागि छुट्याएको बजेटले शनिश्चरे बजारमा अत्याधुनिक सुविधा समपन्न शौचालय निर्माण गरिएको बताए । नगरलाई निःशुल्क योजना सहितको पुस्तक हस्तातरण गरेको प्रति उनले योजना तर्जुमा विज्ञ ढुंगेलप्रति आभार व्यक्त गर्नुभयो ।
नगर उपप्रमुख खड्गमाया पराजुलीले नगरपालिकाको विकास र समृद्धिको लागि सहभागितात्मक प्रक्रियाबाट आवधिक योजना तर्जुमा गरिएको जानकारी दिनुभयो । दीर्घकालिन सोचसहित आगामी पाँच वर्षका लागि आवधिक योजना तर्जुमा गरिएको उल्लेख गर्दै उहाँले योजना कार्यान्वयनका लागि नगरपालिका जिम्मेवार ढंगले प्रस्तुत हुने बताउनुभयो ।
नगरपालिकाका पूर्व प्रशासकीय अधिकृत गीताकुमारी राईले नगरका कार्यक्रम तथा योजनाहरुलाई व्यवस्थित एवं तर्कबद्ध गर्नुपर्ने आवश्यकता पूर्ति गर्न आवधिक योजनाले सहयोग गर्ने विश्वास व्यक्त गर्नुभयो । उहाँले आवधिक योजनाले नगरको समग्र विकासमा मार्गदर्शन गर्ने अपेक्षा राख्नुभयो ।
आवधिक नगर विकास योजनामा के–के छ ?
आवधिक नगर विकास योजनाले मूल रुपमा ५ वटा विषयगत क्षेत्रहरु (आर्थिक विकास, सामाजिक विकास, पूर्वाधार विकास, वन वातावारण तथा विपद व्यवस्थापन र सुशसान तथा संस्थागत विकास) समेटेको छ भने यी विषयगत क्षेत्र भित्र विभिन्न २२ वटा उपक्षेत्रहरु समेटेकोछ । कार्ययोजनामा क्षेत्रगतरुपमावर्तमान अवस्था,लक्ष्य निर्धारण, रणनीति,कार्यनीति तथा क्रियाकलापहरुको विश्लेषण गरेको छ ।
कृषिका लागि पानी,उद्योगका लागि बिजुली र बजारका लागि सडक आधारभूत आवश्यकता भित्र पर्ने भएकोले आवधिक नगर विकास योजनाले सिँचाइ, विद्युत तथा सडकलाई भौतिक विकासको पहिलो प्राथमिकतामा समेटिएकोछ । युवा रोजगारीलाई वढावा दिने गरी सम्मानित कृषिलाई जोड दिएकोछ । अहिलेको अन्तिम पुस्ता कृषि पेशाको पनि अन्तिम पुस्ता हुने खतरा बढिरहेको अवस्थामा त्यसालई रोक्न युवा केन्द्रित विशेष कृषि कार्यक्रमहरु अगाडि सारिएकोछ ।
नगरपालिको समृद्धिका लागि पर्यटन प्रवद्र्धनको अपार सम्भावनालाई आवधिक योजनाले अगाडि सारेकोछ । नगरका २१ वटा प्राकृतिक तथा धार्मिक स्थलहरुलाई पर्यटन विकासको योजना सहित विभिन्न कार्यक्रमहरु सिफारिस गरेकोछ ।
‘पूर्वाधारको विकास गरिवीको अन्त्य समृद्ध अर्जुनधारा सवैको गन्तव्य’ भन्ने दीर्घकालिन सोच सहित मुख्य रुपमा आगामी पाँच वर्ष भित्रमा नगरपालिकालाई समृद्ध बनाउन भौतिक पूर्वाधार,रोजगारी सृजना र पर्यटन विकासलाई विशेष जोड दिइएको छ ।
