रौतहट।
बारासँग जोडिएको साना सीमानाकाहरूबाट चार पाङ्ग्रे सवारी साधन चल्ने सहमति भएको छ। भारतीय सुरक्षाकर्मी एसाएसबीको प्रधान कार्यालयले निर्णय गरेपछि बारासँग जोडिएको तीनवटा साना नाकाबाट चारपांग्रे गाडी चल्ने अनुमति दिएको हो ।
कोरोनापछि नियमित सञ्चालनमा रहेको साना नाकाहरुबाट पाकिस्तानी महिला सीमा हैदर स्थलमार्ग हुँदै भारत गएदेखि भारतीय सुरक्षाकर्मीले चारपांग्रे सवारी साधन आवात जावतमा रोक लगाएको थियो। करिब एकबर्षदेखि एसएसबीले सदियौंदेखि चलिआएको व्यवहारको वास्ता नगरी सीमाक्षेत्रमा आवतजावत गर्ने नेपालीलाई अनावश्यक दुःख दिने गरेको कारण बेटीरोटीको सम्बन्ध प्रभावित बनेको थियो।
यसैगरी रौतहटसँग जोडिएको कुनै पनि नाका बाट गाडी आवत-जावतको लागि हालसम्म अनुमति दिइएको छैन। बाराको ककोर्वा हुँदैभारतको झरोखर-घोडासन, बाराको मटिअर्वा सन्तगन्ज, महुअवा कटगेनवा अदापुर नाकाबाट गाडी आउने जाने अनुमति दिएको भारत बिहार मोतीहारी जिल्लाका एस्पी कान्तेश मिश्राले बताएका छन्।
एसपी मिश्राले रौतहटको सानो नाकाबाट गाडी आवत-जावतबारे छलफल भइरहेको जानकारी दिएका छन्। रौतहटका सीडीओ हिरालाल रेग्मीले रौतहटको साना नाका खोल्ने निर्णयबारे आफूलाई जानकारी नभएको र यसबारे भारतीय समकक्षीसँगको बैठकमा प्रस्ताव राखेर पहल गर्ने प्रतिवद्धता जनाएका छन्। नेपाल र भारतबीच सदियौंदेखि रोटीबेटीको सम्बन्ध रहिआएको छ।
