इलाम।
फिक्कल अस्पतालमा बायो केमेस्ट्रीको पूर्ण स्वचालित ‘एनालाइजर मेसिन’ जडान गरिएको छ ।
सूर्योदय नगरपालिकाको आर्थिक वर्ष २०८०/०८१ को वार्षिक स्वीकृत कार्यव्रmम अनुसार मेसिन खरिद गरी अस्पतालमा जडान गरिएको हो ।
नगरले नागरिकको स्वास्थ्यलाई दृष्टिगत गर्दै अत्यन्तै छिटो परीक्षण रिपोर्ट दिने गरी बायोकेमेस्ट्रीको पूर्ण स्वचालित एनालाइजर मेसिन जडान गरेको जनाइएको छ । सो मेसिन हस्तान्तरण कार्यक्रममा नगरप्रमुख रणबहादुर राई, नगर उपप्रमुख दुर्गाकुमार बराल, प्रमुख प्रशासकीय मिलन भट्टराईलगायतको उपस्थिति थियो ।
मेसिन नेपालमै पहिलोपटक फिक्कल अस्पतालमा जडान गरिएको सूर्योदय नगरपालिकाका स्वास्थ्य शाखा प्रमुख विपुल अधिकारीले जानकारी दिए । मेसिन जडान भएपछि जुनसुकै ल्याबको रिपोर्ट मेसिन चालू भएको १५ मिनेटमा र त्यसपछिको रिपोर्ट प्रत्येक १५/१५ सेकेन्डमा प्राप्त गर्न सकिने शाखा प्रमुख अधिकारीले जानकारी दिए ।
जापानी कम्पनीको ‘बायोलिस ३० आई फुलअटोमेटिक बायोकेमिकल एनालाइजर मेसिन’ को मूल्य बजारमा ४५ लाख भारु छ । मेसिनबाट आएएफटी, एलएफटी लिपिट प्रोफाइललगायत २३० प्रकारको परीक्षण गर्न सकिने जनाइएको छ । मेसिनले एक दिनमा एक हजार पाँच सय जनाको परीक्षण गरी तत्काल रिपोर्ट दिन सक्ने दाबी गरिएको छ ।
शाखा प्रमुख अधिकारीले दुई÷तीन घण्टा पर्खेर लिनुपर्ने रिपोर्ट अब बढीमा २० मिनेटमा पाइने भएपछि सेवाग्राहीलाई सहज हुने बताए । उनले भने – यो मेसिन स्वचालित भएकाले रिपोर्टमा कुनै तलमाथि हुँदैन । यहाँको रिपोर्ट जहाँ गए पनि मान्य हुन्छ । नगरप्रमुख रणबहादुर राईले नगरवासीले अन्यत्र गएर महँगो खर्च तिरेर उपचार गर्नु नपरोस् भनेर नगरले नयाँ प्रविधिको मेसिन जडान गरेको जानकारी बताए ।
सूर्योदय नगरपालिकाले फिक्कल प्राथमिक स्वास्थ्य केन्द्रलाई अस्पतालमा रूपान्तरण गरेपछि अहिले दैनिक दुई सयदेखि तीन सय ५० जनासम्म बिरामी स्वास्थ्य सेवा लिन आउने गरेको अस्पतालका प्रशासन प्रमुख जनस्वास्थ्य निरीक्षक फाजुङ भोटेले जानकारी दिए ।
अस्पतालमा हाल २४ घण्टे आकस्मिक सेवा, ल्याब सेवा, प्रसूति सेवा, एम्बुलेन्स सेवालगायत विभिन्न सेवा सञ्चालन हुँदै आएको छ । १५ श–याको नगर अस्पताल हाल निर्माण भइरहेको छ । नगरका इञ्जिनियर आशिष सुवेदीका अनुसार २०८१ माघ २० गतेभित्रमा सम्पन्न हुने गरी १२ करोड ५५ लाख रुपियाँमा ठेक्का लागेको भवनको ६५ प्रतिशत काम सम्पन्न भएको छ ।
