अर्जुनधारा, हरितालिका तीजको अवसरमा नेपाल विद्यार्थी संघ शनिश्चरे बहुमुखी क्याम्पस इकाई समिति र संघ अर्जुनधारा नगर समितिको संयुक्त आयोजनामा बुधबार शुभकामना आदानप्रदान कार्यक्रम सम्पन्न भएको छ ।
क्याम्पसको सभाहलमा संघका इकाई समिति सभापति विशाल थापाको अध्यक्षतामा आयोजित उक्त कार्यक्रमको प्रमुख अतिथि संघ झापाका सभापति सञ्जय निरौलाले उद्घाटन गरेका थिए ।
संघ नगर समितिका सभापति दीपेन धिमालले कार्यक्रमको औचित्य माथि प्रकाश पारेको कार्यक्रममा नेपाली काँग्रेस पार्टी झापाकी सदस्य पम्फा विश्वकर्मा, क्षेत्रीय सभापति खगेन्द्र मैनाली, नगर सभापति हेमप्रसाद खरेल, क्याम्पस प्रमुख मोहन ओली, क्याम्पसका निवर्तमान स्वतन्त्र विद्यार्थी युनियन सभापति सञ्जिव पौडेललगायतले शुभकामना मन्तव्य राखेका थिए ।
तीज सम्बन्धी गीतमा एकल तथा सामुहिक नृत्य प्रस्तुत गरिएको उक्त कार्यक्रममा सहभागीहरुलाई दर वितरण गरिएको थियो । इकाई समितिका उपसभापति प्रकाश रिजालले स्वागत गरेको उक्त कार्यक्रमको सञ्चालन सदस्य शर्मिला न्यौपाने र सञ्चारकर्मी रञ्जिता खड्काले संयुक्तरुपमा गरेका थिए ।
