दमक , कोशी प्रदेशका मुख्यमन्त्री हिक्मतकुमार कार्कीले झापाको कमल गाउँपालिकामा रहेको प्रादेशिक आयुर्वेद अस्पताललाई आयुर्वेद चिकित्सा अध्ययन–अनुसन्धान केन्द्र बनाउने तयारी भइरहेको बताउनुभएको छ ।
आज अस्पतालमा अन्तरङ्ग, इसिजी, एक्स–रेलगायत सेवा विस्तार कार्यको उद्घाटन गर्नुहँुदै उहाँले अस्पतालको सेवा विस्तारसँगै आयुर्वेद क्षेत्रको समग्र विकासका लागि विज्ञ सम्मिलित कार्यदल नै बनाएर आवश्यक नीतिनियम र कार्यक्रमसहितको योजना ल्याउने काम भइरहेको जानकारी दिनुभयो । मुख्यमन्त्री कार्कीले कार्यदलको सुझावका आधारमा आयुर्वेद क्षेत्रको विकासका लागि प्रदेश सरकारले आवश्यक निर्णय लिने बताउनुभयो ।
उहाँले अस्पतालको स्तरोन्नति र विकासका लागि प्रतिष्ठानका रूपमा लैजान आवश्यक काम थालिसकेको बताउनुभयो । उहाँले भन्नुभयो, “यो अस्पताल आफैँ सक्षम बन्ने किसिमको योजनाअनुसार अघि बढ्नुपर्छ । त्यसमा प्रदेश सरकारको साथ र सहयोग रहन्छ ।”
कोशी प्रदेशका प्रमुख सचिव केदारनाथ शर्माले जनशक्ति अभाव पूर्ति गर्नका लागि प्रदेश सरकारबाट आवश्यक सहयोग गरिने प्रतिबद्धता जनाउनुभयो ।
अस्पतालका निमित्त निर्देशक डा सिद्धार्थ ठाकुरले अस्पतालले पु¥याउँदै आएको सेवाका बारेमा जानकारी गराउनुभयो । उहाँले कोशी प्रदेशभरका बिरामीलाई विशिष्ट सेवा दिने लक्ष्यअनुसार आफूहरूले सेवा विस्तार गरेको स्पष्ट पार्नुभयो । अस्पतालमा दैनिक सय जनाको हाराहारीमा आयुर्वेद स्वास्थ्य सेवा लिन आउने बिरामी आउने गरेको निमित्त निर्देशक ठाकुरले बताउनुभयो ।
