झापा। कनकाई माईको दोमुखामा पौडी खेल्ने क्रममा एक जनाको डुबेर मृत्यु भएको छ भने अर्का एक व्यक्ति बेपत्ता छन् । जिल्ला प्रहरी कार्यालय झापाका अनुसार भद्रपुर नगरपालिका वडा नम्बर ५ निवासी १५ वर्षीय फिरु शेखको डुवेर मृत्यु भएको हो । उनीसंगै पौडी खेल्न पसेका भद्रपुर ५ कै १५ वर्षीय प्रदिप राई बेपत्ता छन् ।
दोमुखामा पौडी खेल्न गएका चार जना मध्ये दुई किशोर हराइरहेका थिए । दिउँसो २ बजेदेखि दोमुखाको ड्याममा पौडी खेल्न पसेका चारमध्ये दुईजना बेपत्ता भएको स्थानीय कुमार फुयलले जानकारी दिए।
‘पौडी खेल्न चारजना पसेका थिए । दुई जना निस्कन सफल भए भने अन्य दुईजना निस्कन सफल भएनन्’– फुयलले भने । दुवै किशोर भद्रपुर माध्यमिक विद्यालयमा अध्ययनरत विद्यार्थी भएको बताइएको छ ।
वेपत्ता राईको खोजी कार्य भइरहेको प्रहरीले जनाएको छ ।
