झापा ।
नेपालमा पछिल्लो समय डेटिङ एप सञ्चालन गरेर ठगी गर्ने गरेको रहस्य खुलेको छ ।
युरोप, अमेरिका, क्यानडालगायत विभिन्न देशमा रहेका पुरुषलाई साथी बनाएर शुरुमा घनिष्ट मित्रता कायम गर्ने र अनलाइन प्लेटफर्ममार्फत ठगी गर्ने गरेको खुलेको हो । प्रोफाइलमा विदेशी महिलाको फोटो प्रयोग गरी पुरुषलाई आकर्षित गरेर ठगी भइरहेको अनुसन्धानका क्रममा खुलेको हो ।
अनलाइन प्लेटफर्ममार्फत बिनान्स, ट्रस्ट वालेटहरूमा अमेरिकी डलर जम्मा गर्न लगाई ठग्ने गरिएको प्रहरीको भनाइ छ । सीआईबीको प्रारम्भिक अनुसन्धानमा हिङ्गी, बम्बल, मुस्लिमा, इन्साहा, सालम, मुज, ओकुपिड, अलखाताबा जस्ता नाम राखिएका डेटिङ एपहरू ठगीका निम्ति प्रयोगमा ल्याएको पाइएको छ ।
बुधबार राति सीआईबीले छापा मारेर ललितपुर महानगरपालिका– १३, एकान्तकुनाको एकताबस्तीस्थित उनीहरूको कार्यालयबाट तीन जना विदेशीसहित ५० जनालाई पक्राउ गरेको थियो । पक्राउ परेका मुख्य व्यक्तिहरू यसअघि पनि यस्तै कारोबारमा दुबईमा कारबाही भोगिसकेकाहरू रहेको सीआईबीले जनाएको छ ।
त्यहाँ उनीहरूले राति ९ बजेदेखि बिहान ५ बजेसम्म काम गर्ने र दिउँसो कार्यालय बन्द गर्ने गरेका थिए । अवैधरूपमा काम गर्न कार्यालय नै भाडामा लिएको सूचना पाएपछि सीआईबीले छापा मारेको थियो ।
कल सेन्टरमा प्रयोग गरेका कम्प्युटर, मोबाइल लगायतका विद्युतीय उपकरणहरू सीआईबीले नियन्त्रणमा लिएको छ । कार्यालयबाट प्रहरीले ५५ वटा डेस्कटप कम्प्युटर, ४ ल्यापटप र १९४ वटा मोबाइल बरामद गरेको छ । उनीहरुका साथबाट विभिन्न देशका मुद्रा पनि बरामद भएको छ । थाइ भाट ५६ हजार ६००, अमेरिकी डलर १२३, तान्जानाइन सिलिङ १० हजार, चिनिया यान १००, युएई दिराम ७९५, टर्किस लिरा १७० र नेपाली रुपैयाँ १ लाख ६२ हजार ५ सय बरामद भएको सीआईबीले जानकारी दिएको छ ।
एकताबस्तीमा जगदीश उपाध्यायको तीन तले घर साढे तीन लाख रूपैयाँ मासिक तिर्ने गरी भाडामा लिएर दुई चिनियाँ र एक जना फिलिपिन्सका नागरिकको संलग्नतामा क्रिप्टोको कारोबार गरेको खुलेको छ । उनीहरूले असार १७ गतेदेखि घर भाडामा लिएका थिए । उक्त घरमा कल सेन्टर सञ्चालन गरी नेपाली युवायुवतीलाई काममा लगाएको पाइन्छ ।
सीआईबीले राति काम गरिरहेका सबै कर्मचारीलाई नियन्त्रणमा लिएको थियो । यसरी जम्मा गराएको रकम गैरकानूनी क्रिप्टो करेन्सीमा लगानी गर्ने र उनीहरूले पनि कारोबार गर्ने गरेको प्रहरीले जनाएको छ ।
क्रिप्टोकरेन्सीको कारोबार गरेको आरोपमा ललितपुरबाट पक्राउ परेका चिनियाँ नागरिक यसअघि संयुक्त अरब इमिरेट्स (यूएई) बाट डिपोट भएको खुलेको छ । यूएईको दुबईमा पनि उनीहरू यस्तो अवैध कारोबार गरेको आरोपमा पक्राउ परेको र युएई सरकारले डिपोट गरिदिएको प्रहरीको केन्द्रीय अनुसन्धान ब्यूरो (सीआईबी) ले जनाएको छ ।
दुबईबाट आआफ्नो देश डिपोट भएकाहरू पुनः नेपालमा जुटेको र पुरानै कारोबार सञ्चालन गरेको पाइएको सीआईबीका प्रवक्ता एसपी होबिन्द्र बोगटीले जानकारी दिए । प्रारम्भिक अनुसन्धानपछि सीआईबीले ८ जनाविरुद्ध मात्रै अदालतबाट हिरासतमा राख्ने अनुमति लिएर अनुसन्धान अगाडि बढाएको छ ।
मुलुकी अपराध संहिता, २०७४ मा उल्लिखित अभौतिक मुद्राको प्रयोग गर्न नहुने कसुर अन्तर्गत ललितपुर जिल्ला अदालतबाट १० दिनको म्याद लिएर अनुसन्धान अगाडि बढाएको प्रहरीले जानकारी दिएको छ । प्रहरीका अनुसार ४२ जनालाई हाजिर जमानीमा राखिएको छ ।
उक्त कार्यालयका सञ्चालक दुई चिनियाँ हुन् । चिनियाँ नागरिक दिङ जिअहोङ र लिन किङजिन रहेको पाइएको छ । यस्तै फिलिपिन्सकी हनिपा सिन्सुअत पनि पक्राउ परेकी छन् । उनी भाषा सहयोगी एवम् अनुवादक हुन् । अरु ५ जना नेपाली हिरासतमा छन् ।
कम्पनीका ग्रुप लिडरहरु रौतहटको चपुर नगरपालिका–८ का कमल कँडेल, इलाम सूर्योदय नगरपालिका–१३ का सन्दीप आचार्य, झापाको कमल गाउँपालिका–३ का सुजन प्रधान र सुनसरीको इटहरी उपमहानगरपालिका–२ का विजयबहादुर गिरी हिरासतमा छन् ।
यस्तै नवलपरासीको बर्दघाट नगरपालिका–१३ का सुदीप अधिकारी पनि पक्राउ परेका छन् । अधिकारीले उक्त कार्यालयका लागि घर भाडा सम्झौता गरेको पाइएको छ ।
