बिर्तामोड । 
झापाको बिर्तामोडबाट मोटरसाइकल चोर्ने एक व्यक्तिलाई प्रहरीले इलामबाट पक्राउ गरेको छ ।
बिर्तामोड–१ वाल्मीकि स्कुलको अगाडिबाट हराएको मोटरसाइकलसहित चोरी गर्ने व्यक्ति इलामको माई नगरपालिकामा पक्राउ परेका हुन् ।
पक्राउ पर्नेमा इलामको माई–६ का २४ वर्षीय मनिष गिरी रहेको इलाका प्रहरी कार्यालय विर्तामोडका प्रहरी नायव उपरीक्षक प्रकाश विष्टले जानकारी दिए ।
मंगलवार बिहान वाल्मीकि स्कुल अगाडिबाट मे ६ प २८६७ नम्बरको २२० सिसीको पल्सर मोटरसाइकल चोरी भएको थियो ।
वाल्मीकिमा स्नातक पढ्दै गरेका बिर्तामोड–५ का सविन शेर्माले स्कुलअगाडि राखेको सो मोटरसाइकल हराएको थियो । हराउनेबित्तिकै उनले त्यसबारे इलाका प्रहरी कार्यालय बिर्तामोडमा जानकारी गराएका थिए ।
मोटरसाइकल खोजी गर्ने क्रममा गिरीलाई मोटरसाइकलसहित पक्राउ गरेर इलाका प्रहरी कार्यालय बिर्तामोडमा ल्याइएको प्रहरी नायव उपरीक्षक विष्टले बताए ।
