अर्जुनधारा ।
४२ औं वार्षिक अनुष्ठानको क्रममा पूर्वको पशुपतिनाथले परिचित झापाको अर्जुनधारा–७ स्थित अर्जुनधारा जलेश्वर धाम क्षेत्रमा दैनिक पुग्ने भक्तजनहरुको संख्यामा वृद्धी भएको छ ।
विश्व शान्तिको कामना र पितृ उद्धारको मुख्य उद्देश्यले गत मंसीर ८ गतेदेखि शुरु भएको अष्टोत्तरशत्(१०८) श्रीमद् भागवत पाठपारायण साथै संगीतमय कथा प्रवचन एवम् हवनात्मक महायज्ञको पाँचौं दिनसम्म झापासहित देशका विभिन्न स्थान र छिमेकी देश भारतबाट भक्तजनहरु आएसँगै उनीहरुको संख्यामा वृद्धि भएको हो ।
दैनिकरुपमा हुने महायज्ञका प्रमुख आचार्य धर्मदर्शन फाउन्डेशनका संस्थापक एवम् धामका व्यासाचार्य पण्डित कुवेर सुवेदीको कथा प्रवचन, सहआचार्य एवम् धामका मूलअर्चक अग्निप्रसाद सिग्देलको आचार्यकत्वमा १०८ जना आचार्यसहितको श्रीमद् भागवत पाठपारायण, पाँच जना यज्ञाचार्यको साथमा ५१ जना बटुकद्वारा यज्ञमण्डपमा हुने हवन रुद्रीपाठ, पाँच जना ब्राह्मणद्वारा गरिने महाआरती(गंगा आरती), महात्मय, झाँकीसहितको संगीतमय भजन किर्तनका कारण धाम क्षेत्रमा आउने भक्तजनहरुको संख्यामा वृद्धी भएको हो ।
हालसम्म संघीय राजधानी काठमाण्डौं, उदयपुर, सुनसरी, मोरङ, इलाम, पाँचथर, ताप्लेजुङसँगै भारतको सिक्किम, पश्चिम बंगालबाट भक्तजनहरु दर्शनका लागि आएको धाम व्यवस्थापन समितिका महासचिव शिवलाल खतिवडाले जानकारी दिए ।
त्यसैगरी धाम प्रवेश गर्ने मुख्य चोक अर्जुनधारा–८ स्थित शनिश्चरे बजारदेखि धाम मुख्य प्रवेशद्वारसम्म आकर्षकरुपमा सजाइएको विभिन्न किसिमका विद्युतीय सामग्रीहरुबाट श्रृंगार गरिएको धाम क्षेत्रलाई अवलोकन गर्न आउने आन्तरिक पर्यटकहरुको संख्यामा पनि वृद्धी भएको छ ।
त्यस्तै सोही अनुष्ठानलाई लक्षित गरि दैनिक रुपमा अर्जुनधारा नगरपालिकासँगै नगरपालिका बाहिर रहेका विभिन्न पालिकाका संस्थागत विद्यालयबाट विद्यार्थीहरु अवलोकनका लागि धाम क्षेत्रमा आउने गरेका छन् ।
