पथरीशनिश्चरे,
पथरी शनिश्चरे नगरपालिकाका नगर प्रमुख मोहनप्रसाद तुम्वापोले जीबीओ न्यू स्कुलको भवन उद्घाटन गर्नुभएको छ ।
मंगलबार पथरी शनिश्चरे वडा नं. १० को शिविर डाँडामा अवस्थित सो जीबीओ न्यू स्कुलको भवन नगर प्रमुख तुम्वापोले उद्घाटन गर्नुभएको हो । उद्घाटन पश्चात् नगर प्रमुख तुम्वापोले विद्यालय भवनको अनुगमन पनि गर्नुभएको थियो ।
भवन उद्घाटन पश्चात् आफ्नो सारगर्भिक भनाइहरु राख्नुहुँदै प्रमुख अतिथि समेत रहनुभएका नगर प्रमुख तुम्वापोले विद्यालय भवन निर्माण मात्र होइन, सो विद्यालयमा अध्ययन गर्न आउनुहुने विद्यार्थीको अध्ययनलाई पनि विशेष महत्व दिनुपर्ने बताउनुभयो । उहाँले विद्यालय व्यवस्थापन र संचालनका लागि नगरपालिकाले गर्नु पर्ने सहयोग गर्न आफू सदैव तत्पर रहेको विश्वास दिलाउनुभयो।
भवन उद्घाटनसँगै विद्यालयलाई सहयोग गर्ने सहयोगीहरुलाई सम्मान पनि गरिएको थियो । डी.बी. राईको अध्यक्षतामा भएको सो कार्यक्रममा वडा नं. १० का अध्यक्ष जीवन खतिवडा, वडा नं. ७ का अध्यक्ष उद्धवराज बस्नेत, वडा नं. १ का अध्यक्ष भीम राई, नगर शिक्षा शाखा प्रमुख नवीन खुलाल बुढाथोकी, स्वास्थ्य शाखा प्रमुख मुरारी आचार्य, शिविर पूर्व क्याम्प सचिव चम्पासिंह राई, सी.एम.सी. सचिव कर्णबहादुर राई, नेव भट्टराई, बेलडाँगी शिविर सचिव सन्चाहाङ सुब्बा लगायतले शुभकामना मन्तव्य रहेको थियो ।
श्री बटिका बाल विकास केन्द्र स्कुल पथरी शनिश्चरे क्याम्पले आयोजना गरेको सो कार्यक्रममा आकर्षक नृत्यहरु प्रस्तुत गरिएका थिए ।
