अर्जुनधारा ।
झापाको अर्जुनधारा–३ खुदुनाबारीस्थित परोपकार युवा समूहको आयोजनामा हालै सम्पन्न भएको लिम्बुनी ठूली स्मृति कप प्रदेशस्तरिय खुल्ला नकआउट फुटबल प्रतियोगिता–२०८१को आय–व्यय विवरण शनिबार सार्वजनिक गरिएको छ ।
स्थानीय कैदले पर्यापर्यटन केन्द्रको सभाहलमा समूहका उपाध्यक्ष एवम् प्रतियोगिता मूल आयोजक समितिका संयोजक सूर्य इम्वुङको अध्यक्षता र प्रतियोगिताका मुख्य प्रायोजक हाल अमेरिकाको रोचेष्टर न्यूयोर्क सिटीमा बसोबास गर्ने बाबी सुब्बाको प्रमुख आतिथ्यमा उक्त विवरण सार्वजनिक गरिएको हो ।
कार्यक्रममा आन्तरिक लेखा समितिका संयोजक अर्जुन निरौलाले प्रतियोगिताको आय–व्यय विवरण प्रस्तुत गरेका थिए । जसअनुसार मुख्य प्रायोजक सुब्बाबाट प्रतियोगिता सञ्चालनको लागि १५ लाख ९८ हजार नौ सय ८२ रुपैयाँ आर्थिक सहयोग प्राप्त भएको प्रतिवेदनमा उल्लेख गरिएको छ ।
त्यसैगरी अमेरिका निवासीद्वय आरबी खड्काबाट स्थानीय कैदले प्राकृतिक रंगशालाको मैदान व्यवस्थापन तथा मञ्च निर्माण गर्न एक लाख ५० हजार रुपैयाँ र लाल थापाबाट मैदान व्यवस्थापन गर्न १० हजार पचास रुपैयाँ प्राप्त भएको बताइएको छ ।
समूहका पूर्व अध्यक्ष दीपक दुलालले स्वागत गरेको उक्त कार्यक्रमको सञ्चालन प्रवक्ता युवराज चापागाईंले गरेका थिए । स्थानीय कैदले प्राकृतिक रंगशाला निर्माण गर्ने अभियान अन्र्तगत समूहले विगत वर्षहरुदेखि नै फुटबल सम्बन्धी विभिन्न प्रतियोगिता सञ्चालन गर्दै आएको छ ।
