योगेन्द्र योगी
बिराटनगर,
साउदीको रियादस्थित नेपाली दूतावासले १ हजार ३५ नेपाली श्रमिकलाई उनीहरु कार्यरत स्थानमै पुगेर सेवा दिएको छ। दूतावास रियादबाट टाढा रहेका नेपाली श्रमिकहरूलाई उनीहरू कार्यरत स्थानबाटै दूतावासद्वारा प्रदान गरिने सेवा प्रवाहका लागि घुम्ती शिविर सञ्चालन साउदीको जुवेलमा राहदानी नवीकरण, नेपाल फिर्ता हुन चाहेका तर रोजगारदाताले वहिर्गमन भिषाको प्रकृया नगरेकाले घर जान नपाएका नेपाली श्रमिकका वहिर्गमन भिषाको लागि फाराम भर्ने कार्य, श्रमिक सचेनता लगायतका सेवा प्रवाहका लागि घुम्ती शिविरको आयोजना गरिएको हो।
गैर आवासीय नेपाली संघ, राष्ट्रिय समन्य परिषद्, साउदीसँगको सहकार्य र साउदी अरेबियामा क्रियाशिल अन्य संघसंस्थाको सहयोगमा सञ्चालन गरिएको उक्त २ दिने घुम्ती शिविरमा विद्युतीय राहदानीका लागि १०२५ जना नेपाली श्रमिकहरूको लाइभ इनरोलमेन्ट गरिएको थियो । उक्त शिविरमा नेपाल फिर्ता हुन चाहाने १० जना नेपाली श्रमिकहरूको वहिर्गमन भिषाको फाराम भरी प्रकृया अगाडी बढाइएको दूतावासले जनाएको छ ।
यसरी उक्त शिविरबाट १,०३५ नेपाली श्रमिकहरूले उनीहरू कार्यरत स्थानमै प्रत्यक्ष रुपमा राजदूतावासको सेवा प्राप्त गरेका थिए । उल्लिखित सेवा प्रवाहबाट साउदी रियाल २०६,५०० अर्थात् करिब छेहत्तर लाख नेपाली रुपैंया राजश्व संकलन भएको छ।
साउदीको राजधानी रियादबाट टाढा रहेका स्थानमा कार्यरत, पारिश्रमिक तथा सुविधा कम भएकाले सेवा लिन रियाद आउदा जादा सवारी साधनको भाडा तिर्न धौ धौ पर्ने एवं कम्पनीबाट विदा नपाउने अवस्थामा रहेका नेपाली श्रमिकहरूलाई राहदानी लगाएतको सेवा प्रवाह गर्न आयोजना गरिएका यस्ता घुम्ति शिविरहरू नेपाली श्रमिकहरूका हित, सुविधा एवं राजश्व संकलनका दृष्टिकोणले अत्यन्त आवश्यक, महत्वपूर्ण र प्रभावकारी भएको जनाएको छ।
घुम्ती शिविर सफल बनाउन दूतावाससँग सहकार्य गर्ने गैर आवासीय नेपाली संघ राष्ट्रिय समन्वय परिषद् साउदी अरेबिया र राजदूतावासलाई सहयोग गर्ने अन्य संघ संस्थाका पदाधिकारी, प्रतिनिधि एवं स्वयंसेवकलाई उनीहरुको भूमिकाको उच्च कदर र प्रशंसा गर्दै दूतावासले सबैमा हार्दिक धन्यवाद ज्ञापन गरेको छ।
यता, कार्यरत स्थानमै दूतावासको सेवा पाउदा नेपाली श्रमिकहरु पनि दङ्ग भएका छन्। कहिले रोजगारदाता कम्पनीले बिदा नदिने दिए पनि पैसा नहुने लगायत अनेकौ समस्या भोगिरहेका उनीहरु कार्यरत स्थानमै दूतावास आएर सेवा दिंदा हर्षित भएका छन्। साउदीमा विभिन्न पेशामा गरी करिव ५ लाख भन्दाबढी नेपाली कार्यरत रहेको पाईन्छ।
