विनोद सापकोटा,
शिवसताक्षी।
शनिबार बिहान सेभेनसिज अङ्ग्रेजी माध्यमिक विद्यालयको प्राङ्गण भिन्नै थियो । हिजो हाँसो–ठट्टाले गुञ्जने यो ठाउँ एकाएक शान्त बन्यो । भावनाहरूको बाढी चलेको थियो । एसइइ परीक्षा सकेर विद्यालयबाट बिदा लिन आएका ४५ विद्यार्थीहरूका आँखामा चमक त थियो । तर बिछोडको पीडाले तिनलाई ओसारिरहेको थियो । विद्यालयले प्रदान गरेको खादामाला र मायाको चिनो ग्रहण गर्दा उनीहरू एकआपसमा अँगालो मारेर रुन त सकेनन् । तर रुन्चे हाँसो भने अवस्य थियो ।
१० वर्षको लामो सहयात्रा समापन हुँदै गर्दा उनीहरूका आँखामा सयौँ सम्झनाहरू नाचिरहेका थिए । पहिलो दिन विद्यालय भित्रिएको क्षणदेखि कक्षाकोठामा मन मस्तिकले कैद गरिएका ति पलहरूले उनिहरुलाई पोलिरहेको थियो । साथीहरूसँग बाँडेका हाँसो र शिक्षकहरूसँगका सम्झनाहरू सबै कुरा विद्यार्थीका मनमा उर्लिएर आए । साथीभाइसँग छुट्टिने क्षणले कतिपयले आँसु रोक्न सकेनन् । कसैले कुहुनाले त कसैले हातको पञ्जा र औलाले आँसुले भरिएको ति आँखाका डिल पुछ्दै थिए ।
विद्यार्थीहरू भावनाको भेलमा डुबिरहेका बेला उनीहरूका केही शब्दहरूले माहोल झनै भावुक बनायो । पुर्वाञ्चल दैनिक संग कुरा गरेका शुभम मुखिया, खुसी रिजाल, रोशनी बस्नेत लगायतका विद्यार्थीहरूले विद्यालयमा रहँदा जान–अनजानमा भएका गल्तीहरूको लागि शिक्षकहरूसँग माफी मागे । ‘हामीले यहाँ सिकेको ज्ञान केवल आफ्ना लागि होइन, देशको सेवाका लागि प्रयोग गर्नेछौँ,’ उनीहरूले आँसु पुछ्दै भने ।
कार्यक्रमको सबैभन्दा भावुक क्षण तब आयो जब सामाजिक विषयकी शिक्षिका दीपा राईले बिदाइ मन्तव्य दिन थालिन् । बोल्दै गर्दा उनको गला अड्कियो । आँसु थाम्न सकिनन् । ती दीपा राई नै हुन् । जसले विद्यालयमा मात्र होइन । होस्टेलमा समेत अधिकांश विद्यार्थीको अभिभावकसरह हेरचाह गरेकी थिइन् । उनको आँखाबाट बगेका आँसुहरूले वातावरणलाई स्तब्ध बनायो । विद्यार्थीहरू पनि रोए । ‘तपाईंहरू मेरा छोराछोरीहरू जस्तै हुनुहुन्छ,’ उनले भनेपछि विद्यार्थीहरू झनै भक्कानिए ।
विद्यार्थीहरूले प्रधानाध्यापक दीपक कडरिया, दीपा राई, नरपति निरौला, भीम भण्डारी, राजु श्रेष्ठ, भिम पौडेल, राम भेटवाल लगायतका शिक्षकहरूप्रति आभार व्यक्त गरे । ‘हाम्रा गुरुबा–गुरुआमाहरू नै असली अभिभावक हुन्,’ विद्यार्थीहरूले श्रद्धापूर्वक भने । शिक्षकहरू पनि भावुक बने । यो बिदाइ केवल विद्यालय छोड्ने मात्र थिएन । यो परिवारको एउटा पृष्ठ समाप्त हुने क्षण थियो ।
विद्यालयका संस्थापक बिर्ख कडरियाको अध्यक्षतामा सम्पन्न समारोहमा प्रधानाध्यापक दीपक कडरिया, झिलझिले माध्यमिक विद्यालयका प्रधानाध्यापक खेमराज निरौला, विद्यार्थी सौगात कडरिया, अभिभावक जगदीप चौहान, समाजसेवी मोहन प्रसाद कडरिया, राजनीतिकर्मी पूर्वा लामा लगायतले शुभकामना मन्तव्य दिए। सबैले विद्यार्थीहरूको उज्ज्वल भविष्यको कामना गरे । वक्ताहरूले सेभेनसिज विद्यालय नगरकै अब्बल शैक्षिक संस्था भएको उल्लेख गरे ।
विद्यालयका शिक्षक नरपति निरौलाले स्वागत मन्तव्य राखेका थिए भने कार्यक्रमको सञ्चालन अर्का शिक्षक सुभाष पोखरेलले गरेका थिए । बिदाइ समारोहमा विद्यार्थीहरूका अभिभावकहरूको पनि उल्लेखनीय सहभागिता थियो । विद्यालय प्रशासनले सहभागी सबैलाई भोजन गराएर कार्यक्रम समापन ग¥यो ।
विद्यालयको आँगन छोड्ने क्रममा विद्यार्थीहरूले आफ्ना गुरुहरूलाई अन्तिम श्रद्धा व्यक्त गरे । कतिपय पछाडि फर्किएर विद्यालयलाई हेर्दै थिए । आँखामा अविस्मरणीय सम्झनाका आँसु विद्यालय छोडेर गइसके पनि यहाँ बिताएका हरेक पलहरू जीवनभर उनीहरूको स्मृतिमा अमिट रहने अभिभावकले बताएकाछन् ।
