झिलझिले,
छिमेकी बचत तथा ऋण सहकारी संस्थाले सदस्य शिक्षा कार्यक्रम सुरु गरेको छ । शिवसताक्षी नगरपालिका वडा नम्बर ८ मा मुख्य कार्यालय रहेको सो सहकारी संस्थाले आफ्नो मंगलबारे सेवाकेन्द्रबाट कार्यक्रमको सुरुवात गरेको हो ।
यो कार्यक्रममा कम्तिमा ३ हजार ५ सय सदस्यलाई सहभागि गराउने संस्थाका अध्यक्ष मोहन मैनालीले जानकारी दिएका छन् । शनिबार वडा नम्बर २ को वडा कार्यालय सभा हलमा सम्पन्न कार्यक्रमलाई संस्थाका कार्यकारी प्रमुख नवीन ओलीले सहजीकरण गरेका थिए । कार्यक्रममा ५६ जना सदस्यको उपस्थिति रहेको थियो । उनले सहकारी संस्थाको इतिहास, वित्तीय कारोबार तथा भविष्यका सम्भावनाहरूको बारेमा जानकारी गराएका थिए । साथै, संस्थाको वासलातसम्बन्धी विस्तृत जानकारी समेत प्रदान गरेका थिए ।
४ हजार ५सय सदस्य रहेको यो सहकारी संस्था २०६४ साल भदौ ४ गते स्थापना भएको हो । हालसम्म संस्थाले झापाको विभिन्न क्षेत्रमा पाँचवटा सेवा केन्द्र विस्तार गरिसकेको छ । सुरुङ्गा, केर्खा, दमक, मंगलबारे र जनता क्षेत्रमा यसका सेवा केन्द्र सञ्चालनमा छन् ।
१५ करोड रुपैयाँ सेयर पुँजी रहेको संस्थामा ४३ जना कर्मचारी कार्यरत छन् । कार्यक्रमका प्रमुख अतिथि तथा सहकारी संस्थाका उपाध्यक्ष उदयपकाश राईले सदस्यहरूलाई सहकारीमा बचत गर्ने र आवश्यक परेको बेला कर्जा कारोबार गर्न आग्रह गरे । उनले सहकारी संस्थाको विकासक्रमबारे सहभागीलाई जानकारी गराए ।
कृषि क्षेत्रका अभियन्ता नारायण प्रसाद ढकालले सदस्यहरूलाई स्वस्थ जीवनशैली अपनाउन र विषादीरहित तरकारी उपभोग गर्न सुझाव दिए । उनले अस्वस्थ खानपान तथा जीवनशैलीका कारण डरलाग्दा रोगहरूको जोखिम बढिरहेको बताउँदै स्वस्थ रहन प्राकृतिक तथा जैविक कृषि उत्पादनमा जोड दिनुपर्ने धारणा व्यक्त गरे ।
कार्यक्रमको अध्यक्षता शिक्षा समितिका संयोजक बेनु कार्कीले गरेका थिए भने प्रमुख अतिथि उपाध्यक्ष उदयपकाश राई रहेका थिए । सदस्य परशुराम ढुङ्गाना तथा सहभागी प्रतिनिधि कुमार बास्कोटाले कार्यक्रम उपयोगी भएको बताए । कार्यक्रमको सहजीकरण सचिव विनोद सापकोटाले गरेका थिए भने स्वागत सेवा केन्द्र सहयोग समितिका संयोजक विष्णुप्रसाद चिमरियाले गरेका थिए ।
