अमित खम्बू
अर्जुनधारा, झापाको अर्जुनधारा–८स्थित शनिश्चरे–अर्जुनधारा खानेपानी तथा सरसफाई उपभोक्ता समितिले ३७ महिनाको अवधिमा गरेको गतिविधिहरु मंगलबार एक कार्यक्रमकोबीच सार्वजनिक गरेको छ ।
२०७८ फागुन ७ गते सम्पन्न निर्वाचनबाट निर्वाचित भएको अध्यक्ष किरण शिवाकोटी नेतृत्वको वर्तमान समितिले कार्यालयमा आयोजित पत्रकार भेटघाट कार्यक्रममा उक्त गतिविधिहरु सार्वजनिक गरिएको हो ।
२०७९ असार २७ गतेबाट संस्थाको अर्जुनधारा–९ मगरचोकस्थित चार लाख ५० हजार लिटर क्षमताको ओभरहेड ट्याङकी नं. २ सञ्चालन गर्दै कार्य शुरु गरेको समितिले गत चैत १५ गतेसम्म विभिन्न गतिविधिसँगै निर्णयहरु गरेको पत्रकार भेटघाटमा प्रस्तुत प्रतिवेदनमा उल्लेख गरिएको छ । 
समितिले अघिल्लो आर्थिक वर्ष २०७९÷०८०मा नेपाल सरकार शहरी विकास मन्त्रालयको अनुदानबाट ११ किलोमिटर पाइपलाइन विस्तार, सडक विस्तारको क्रममा भत्काइएको मुख्य कार्यालय क्षेत्रको कम्पाउण्ड वाल निर्माण, गेट निर्माण तथा पेभर्स लगाउने, मुख्य कार्यालयमा रहेको ओभरहेड ट्याङकी नं. १को पम्प कम्प्रेसरलाई दीयालो टेक्नोलोजीद्वारा अटोमेसन गरेको, १३ हजार रुपैयाँ तोकिएको धारा जडान शुल्कलाई घटाएर नौ हजार नौ सय ९९ रुपैयाँ कायम गरेको, विपन्न, अपाङ्ग, अशक्त, ज्येष्ठ संस्थालाई धारा जडान शुल्कमा २५ प्रतिशत छुट, जलस्रोतमा दर्ता रहेको खानेपानीलाई आन्तरिक राजश्व कार्यालयमा दर्ता गरेको छ ।
त्यसैगरी समितिले गत आर्थिक वर्ष २०८०÷०८१मा संघीय सरकारको अनुदानबाट मुख्य कार्यालयमा एक थान डिप बोरीङ निर्माण, कर्मचारीको लागि ई–हाजिरीको व्यवस्था गरेको छ । त्यस्तै चालु आर्थिक वर्ष २०८१÷०८२मा एसवाई प्यानलको प्रयोगबाट समितिलाई आवश्यक बैठक हलको निर्माण, अर्जुनधारा–६ कप्तानबारीस्थित अपाङ्ग बाल शिक्षा सरोकार केन्द्र र अर्जुनधारा–७स्थित पालिकाको एक मात्र सामुदायिक क्याम्पस शनिश्चरे बहुमुखी क्याम्पसमा निःशुल्क धारा जडान तथा अर्जुनधारा–८स्थित नयाँ कृषि बजार क्षेत्रमा रहेको सशस्त्र प्रहरी बल शनिश्चरे बेसमा निःशुल्क धारा जडान गर्ने निर्णय गरेको बताइएको छ ।
आर्थिक अभावका कारण धारा जडान गर्न नसक्ने उपभोक्ताका लागि गत माघ १५ देखि किस्ताबन्दीमा धारा जडान गर्ने सेवा शुरु गरेको समितिले अर्जुनधारा–९ मगरचोकस्थित ओभरहेड ट्याङकी नं. २लाई दीयालो टेक्नोलोजीद्वारा पम्प÷कम्प्रेसर आदिलाई अटोमेसन गरेको छ ।
त्यस्तै यही नयाँ वर्ष २०८२ वैशाख १ गतेदेखि लागु हुने गरि हाल कायम रहेको पानी महशुल एक सय ५० रुपैयाँलाई संशोधन गर्दै प्रत्येक महिना आठ यूनिट अर्थात् आठ हजार लिटरसम्म पानी प्रयोग गर्ने उपभोक्ताबाट एक सय ३० रुपैयाँ मात्र महशुल लिने समितिले निर्णय गरेको छ ।
यता समितिले ठेक्का मार्फत् हाल १८ करोड बराबरको लागतमा वृहत खानेपानी आयोजना अन्र्तगत गर्नुपर्ने विभिन्न कार्यहरुमध्ये केही निर्माण सम्पन्न भएको र केही निर्माण भइरहेको अवस्थामा रहेको छ ।
नगरपालिका अन्र्तगत ५, ६, ७, ८, ९, १० र ११ नं. वडाका ६८१५ घरधुरीका ३० हजार तीन जना जनसंख्यालाई प्रत्यक्ष लाभान्वित हुने गरि सञ्चालनरत उक्त आयोजना अन्र्तगत एक सय ८० किलोमिटरमध्ये हालसम्म ८० किलोमिटर बढीमा सडकको दुवैतर्फ पाइपलाइन विस्तार कार्य भइरहेको छ भने एक थान डिप बोरीङ, एक थान भवन निर्माण, भल्भ, च्याम्बर, एक थान जेनेरेटर, एक थान ट्रान्सफर्मर, एक थान ट्रिटमेन्ट प्लान्ट जडानको कार्य सम्पन्न भएको छ ।
आगामी आर्थिक वर्ष २०८२÷०८३ भित्र सम्पन्न गर्नुपर्ने उक्त आयोजना वर्तमान समितिको लागि महत्वपूर्ण उपलब्धी र उपभोक्ताहरुको लागि अर्थपूर्ण योजना भएको अध्यक्ष शिवाकोटीले दावी गरेका छन् ।
हाल संस्थाको मुख्य कार्यालय र मगर चोकमा रहेको क्रमश दुई लाख २५ हजार र चार लाख ५० हजार लिटर क्षमताको ओभरहेड ट्याङकीसँगै अर्जुनधारा–८ गढीगाँउ क्षेत्रमा संस्थालाई प्राप्त भएको १० कठ्ठा जमिनमा चार लाख ५० हजार लिटर क्षमताको थप एउटा ओभरहेड ट्याङकी बनाउने समितिको लक्ष्य रहेको छ ।
त्यसको लागि संघीय सरकार र प्रदेश सरकारसँग पहल गरेको समितिको तेस्रो ओभरहेड ट्याङकी निर्माण गर्ने योजना सफल भएको खण्डमा पालिकाको सात वटा वडामा बस्ने सबै उपभोक्ताको पहुँचमा खानेपानी सहजरुपमा पुग्ने बताइएको छ । समितिका अध्यक्ष शिवोकोटीको अध्यक्षतामा आयोजित उक्त कार्यक्रमको सञ्चालन सचिव राकेश ढकालले गरेका थिए ।
