काठमाडौँ,
नेपाल पर्यटन बोर्डले भारतीय पर्यटकहरुका लागि सीमापार आवागमन सहज बनाउने प्रयास गरिरहको जनाएको छ । नयाँदिल्लीस्थित नेपाली दूतावासमा भएको ‘नेपाल फेस्टिभल’अन्तर्गत ‘दिगो पर्यटन सुदृढीकरणः धार्मिक, सम्पदागत र साहसिक पर्यटन प्रवर्द्धन’ शीर्षकको सत्रमा बोर्डका वरिष्ठ निर्देशक हिक्मतसिंह ऐरले भारतीय पर्यटकको आवागमन सहजताका लागि भइरहेका प्रयासबारे जानकारी गराउनुभएको थियो ।
वरिष्ठ निर्देशक ऐरले भन्नुभयो, “हामीले भारतीय पर्यटकको आवागमन सहजता बनाउने प्रयास गरिरहेका छौँ ।” यसका साथै धार्मिक तथा साहसिक पर्यटनलाई समेट्ने नेपालको समग्र दीर्घकालीन दृष्टिकोण र नीतिगत सुधारका कामहरु भइरहेको उहाँले जानकारी दिनुभयो ।
भारत नेपालको सबैभन्दा ठूलो पर्यटक स्रोत बजार भएकाले बोर्डले सीमा पार पर्यटन प्रवर्द्धनमा अझ सक्रिय भई सहकार्य गर्ने लक्ष्य लिएको छ । कार्यक्रममा बोर्डकातर्फबाट वरिष्ठ निर्देशक ऐयर र वरिष्ठ अधिकृत सागर उपाध्यायले प्रतिनिधित्व गर्नुभएको थियो ।
नेपाल र भारतबीचको सांस्कृतिक तथा आर्थिक सम्बन्धलाई थप मजबुत बनाउने उद्देश्यले वर्षको अन्तिम साता एभरेष्ट चेम्बर अफ कमर्स एण्ड इन्डस्ट्रिज र नयाँदिल्लीस्थित नेपाली दूतावासको सहकार्यमा आयोजना गरिएको उक्त कार्यक्रमको उद्घाटन भारतका संस्कृतिमन्त्री गजेन्द्रसिंह शेखावत, नेपालका कानुन, न्याय तथा संसदीय मामिलामन्त्री अजयकुमार चौरसिया र भारतका लागि नेपालका राजदूत डा शङ्कर प्रसाद शर्माले संयुक्त रूपमा गर्नुभएको थियो । तीन दिनसम्म चलेको कार्यक्रममा नेपाल–भारत सम्बन्ध, व्यापार सहकार्य तथा पर्यटनको भविष्यसम्बन्धी विविध समसामयिक विषयमा बहस तथा गोष्ठीहरू आयोजना गरिएको बोर्डले विज्ञप्तिमार्फत जनाएको छ ।
उक्त सत्रमा नेपाल सरकारका पूर्वमुख्यसचिव लीलामणि पौडेल, भारतको पर्यटन मन्त्रालयका उपमहानिर्देशक डा आर. के. सुमन, गोल्डेन एपका अध्यक्ष नीरज साहदेव, एभरेष्ट चेम्बर अफ कमर्सका अध्यक्ष युवराज बराल, तथा धुलिखेल माउन्टेन रिसोर्टकी प्रमुख कार्यकारी अधिकृत लीना खड्का श्रेष्ठको सहभागिता थियो । चर्चित भारतीय पर्यटन विज्ञ डा सुभाष गोयलले सत्र सञ्चालन गर्नुभएको थियो ।
नेपाल पर्यटन बोर्डको प्रदर्शनी कक्ष (पवेलियन) ले नेपाली संस्कृति, प्रकृति, साहसिक यात्रा, अध्यात्मिक तथा वेलनेस पर्यटनजस्ता विषयवस्तुहरू प्रस्तुत गरेको थियो । स्टलमार्फत विभिन्न प्रचार सामग्री, जानकारीमूलक पुस्तिका तथा नेपाली पहिचान झल्काउने सामग्रीहरू वितरण गरिएको थियो ।
कार्यक्रममा नेपाली परिकारहरूको प्रदर्शनीले भारतका आगन्तुकलाई नेपालको स्वाद चाख्ने अवसर प्रदान गरेको थियो । साथै, नेपाली हस्तकला र स्थानीय उत्पादनहरूको प्रदर्शनीले नेपालको समृद्ध हस्तकला परम्परा उजागर गरेको बताइएको छ ।
—
