चारआली ।
मेचीनगर नगरपालिकाकाले चारआलीमा रहेको मनकामना अस्पतालको सबै सेवाहरु बन्द गर्न अनुरोध गरेको छ । नगरपालिकाले कात्तिक २० गते मेचीनगर–१३ स्थित मनकामना अस्पताल प्रालिलाई अस्पतालले दिने सबै सेवाहरु बन्द गर्न पत्र पठाएको थियो ।
गत असोज ३० गते अस्पताललाई नियमानुसार सञ्चालन स्वीकृति सम्बन्धी आवश्यक कागजातसहित उपस्थित हुन गरिएको परिपत्र अनुसार हालसम्म पनि मापदण्ड बमोजिम दर्ता प्रक्रियामा नआएको, कुनै पनि स्वास्थ्य संस्था नियमानुसार दर्ता, नविकरण नगरी सेवा सञ्चालन गर्नु गैरकानुनी भएको हुँदा सो प्रक्रिया पूरा नगरेसम्म अस्पतालका सम्पूर्ण सेवा बन्द गर्न नगरपालिकाले अनुरोध गरेको हो ।
अस्पताल अवैध रूपमा सञ्चालन गरिएको सार्वजनिक भएपछि स्वास्थ्य कार्यालय झापा र नगरपालिकाको स्वास्थ्य शाखाले अनुगमन गरेको थियो । अनुगमनका क्रममा अस्पतालले दर्ता र नविकरण गरेको कागजात देखाउन सकेन । नगरपालिकाको स्वास्थ्य शाखामा समेत दर्ता गरेको देखिएन । डाक्टर दिलिपकुमार यादवले उक्त अस्पताल अवैध रुपमा सञ्चालन गरिरहेका थिए ।
अस्पतालको वार्षिक प्रतिवेदनसहित दर्ता नविकरण नगरेको पाइएमा पहिलो चरणमा स्वास्थ्य शाखाले लिखित पत्र पठाउँछ । पहिलो पटक पठाएको पत्रलाई अटेर गरेको पाइएमा दोश्रो पटक ३० हजार रुपैयाँ सम्मको जरीवाना गर्छ । माथिका दुवै प्रक्रियामाथि अटेर गरेको पाइएमा कानुनीरूपमै सञ्चालन गर्न नपाउने गरी दर्ता प्रमाणपत्र खारेजी गर्न सक्ने नियम रहेको छ ।
स्थानीय तह सञ्चालन ऐन तथा कार्यविधि अनुसार नगरपालिकाको स्वास्थ्य शाखाले नै अनुगमन र कारवाही गर्ने अधिकार रहेको छ ।
