सुन्दरहरैंचा (मोरङ),
मोरङको सुन्दरहरैंचा नगरपालिकामा सामाजिक सेवा र मानवीय संवेदनाको सुन्दर उदाहरण प्रस्तुत भएको छ।
सुन्दरहरैंचा–१० बागझोडामा शारीरिक रूपमा अशक्त एक व्यक्तिका लागि “सहयोगी मनहरू” नामक सामाजिक संस्थाले घर निर्माण गरेर हस्तान्तरण गरेको छ। संस्थाको पहल र सहयोगले बनेको उक्त घर अहिले एक विपन्न परिवारका लागि सुरक्षित आश्रय बनेको छ।
संस्थाका अध्यक्ष भीम अधिकारीका अनुसार निर्माण सम्पन्न भएको घरमा कुल लागतको करिब ७५ प्रतिशत रकम संस्थाले जुटाएको हो भने बाँकी २५ प्रतिशत रकम घरधनीले स्वयं लगानी गरेका हुन्। उनले संस्थाका सदस्यहरूबाट रकम सङ्कलन, सहयोगी मनहरू र विभिन्न शुभेच्छुकहरूको आर्थिक सहयोगबाट घर निर्माण सम्भव भएको जानकारी दिए।
अध्यक्ष अधिकारीका अनुसार “सहयोगी मनहरू” संस्था केवल घर निर्माणमै सीमित छैन, समाजका विभिन्न क्षेत्रका विपन्न र असहाय वर्गलाई सहयोग पुर्याउँदै आएको छ। यसअघि पनि संस्थाले विभिन्न स्थानमा घर तथा टहरा निर्माण, विपन्न बस्तीहरूमा कपडा वितरण, तथा विद्यालयका विद्यार्थीहरूलाई न्यानो स्विटर वितरण जस्ता मानवीय कार्यहरू गर्दै आएको छ।
त्यसैगरी संस्थाले आर्थिक अभावका कारण पढाइमा समस्या झेलिरहेका विपन्न तथा जेहेन्दार विद्यार्थीहरूलाई शैक्षिक सामग्री उपलब्ध गराउने र धेरै विद्यार्थीहरूको विद्यालय शुल्कसमेत तिर्दै आएको जनाएको छ। सामाजिक सेवाको दायरा अझ फराकिलो बनाउँदै संस्थाले विभिन्न स्थानमा आँखा शिविर, स्वास्थ्य शिविर लगायतका कार्यक्रम पनि सञ्चालन गर्दै आएको छ।
संस्थाका सचिव खेम गौतमका अनुसार संस्थाको केन्द्रीय कार्यालय सलकपुरमा रहेको छ र आगामी दिनहरूमा पनि समाजमा रहेका असहाय, अपांग तथा विपन्न समुदायका लागि यस्ता सेवा कार्यक्रमलाई निरन्तरता दिइनेछ।
सामाजिक सहयोग, सहानुभूति र एकताको भावना जब एकै ठाउँमा मिसिन्छ, तब समाजमा यस्तै प्रेरणादायी काम सम्भव हुन्छ भन्ने उदाहरण सहयोगी मनहरू संस्थाले प्रस्तुत गरेको स्थानीयवासीहरूको भनाइ छ। यस पहलले केवल एउटा घर मात्र बनाएको छैन, एक परिवारको जीवनमा आशा, आत्मविश्वास र नयाँ सुरुवातको ढोका पनि खोलेको छ।
