विमल दहाल/ माई।
गत असार २८ गते शनिबार बिहानदेखि बेपत्ता भएका माई नगरपालिका –१ जुवालेका तीन बालिकाहरुको प्रहरीको विपद् ब्यबस्थापन टोलीले सोमबारबाट खोजी शुरु गरेको छ ।
स्कूल बिदा भए पछि घर हिँडेका जुवालेका १५ बर्षीया आकृति लिम्बू, १४ बर्षीया निशा सुनुवार र १२ बर्षीया सुनीता साउदेन खोला तर्ने त्रममा बेपत्ता भएपछि सशस्त्र प्रहरी र नेपाल प्रहरीको विपद् ब्यबस्थापन टोलीले सोमबारबाट खोजी शुरु गरेको हो ।
माई नगरपालिका र देउमाई नगरपालिका बीचको माईखोलाबाट खोला तर्ने क्रममा उनीहरुलाई खोलाले बगाएको थियो । बेपत्ता रहेका बालिकाहरुको माई नगरपालिका –१ को चण्डालघाटबाट खोजी कार्य शुरु गरिएको सशस्त्र प्रहरी इलामका डिएसपी हरि थापाले जानकारी दिए ।
टोलीमा सशस्त्र प्रहरी १ नम्बर बाहिनी इटहरीका नौ जना र नेपाल प्रहरीका एक जना स्पेशल टोलीको सहभागिता रहेको बताइएको छ । माई खोला भित्र र्याफ्टीङका माध्यमबाट बालिकाहरुको खाजी भइरहेको छ ।
स्थानीय प्रहरी, संघसंस्था, स्थानीयबासिन्दा र युवाहरुले समेत ट्युवको सहयोगबाट तथा खोला किनारमा खोजी गरिरहेको लोदिया प्रहरी चौकी दानाबारीका इञ्चार्ज विमलकुमार निरौलाले जानकारी दिए ।
