विर्तामोड।
एकीकृत सम्पत्ति करका नाममा बृद्धि गरिएको कर फिर्ता लिन माग गर्दै अर्जुनधारा नगरपालिका अन्तर्गत नेपाली कांग्रेसका ११ वटै वडासमितिले प्रत्येक वडा कार्यालयमा ज्ञापन पत्र बुझाएका छन् ।
नेपाली कांग्रेसका वडा सभापतिहरुको नेतृत्वमा अर्जुनधारा नगरपालिकाका–११ वटै वडाका वडाध्यक्षलाई ज्ञापनपत्र बुझाइएको नेपाली कांग्रेस अर्जुनधारा नगर सभापति हेमराज खरेलले जानकारी दिए ।
नेपाली कांग्रेसका अर्जुनधारा नगर सभापति खरेल, अर्जुनधारा– ५ का वडासभापतिद्वय देवीनाथ खतिवडा र तारानाथ बरालको नेतृत्वमा रहेको कांग्रेस कार्यकर्ताको टोलीले ५ नं वडाध्यक्ष ध्यानवहादुर भारतीलाई ज्ञापन पत्र बुझाएको थियो । अन्य १० वटै वडामा पार्टीका वडासभापतिको नेतृत्वमा वडा कार्यालयमा पुगेको कांग्रेस कार्यकर्ताको टोलीले स्थानीय वडाध्यक्षलाई ज्ञापनपत्र बुझाएका थिए ।
ज्ञापनपत्रमा सिंहदरबारको अधिकार गाउँगाउँमा ल्याउने लोकप्रिय नारासहित सत्तामा पुगेको दुईतिहाई वहुमतको कम्युनिष्ट नेतृत्वको सरकारले जनतालाई असहज हुने गरी लागू गरेको एकीकृत सम्पत्ति कर बृद्धि तत्काल फिर्ता नलिए चुप लागेर नबस्ने चेतावनी दिइएको छ ।
‘जनतालाई शोषण हुनेगरी ल्याइएको एकीकृत सम्पत्ति कर फिर्ता नभए जनताका बीचमा पुगेर चरणबद्ध रुपमा कडा आन्दोलनमा उत्रन बाध्य हुनेछौं’–११ वटै वडामा बुझाइएको एकै ब्यहोराको ज्ञापनपत्रमा भनिएको छ– ‘स्थानीय जनताको व्यापक सहभागिता र नगरमा स्थापित र क्रियाशील राजनीतिक दलको परामर्श, सहकार्य, सुझाव र छलफलविना स्थानीय सरकारद्वारा लादिएको जनविरोधी कर फिर्ता लिई ब्यापक जनसहभागिता र छलफलपछि नयाँ कर निर्धारण गरियोस् ।’
जनताको आम्दानीको स्रोत, क्षमता र अवस्थाको मूल्याङ्कन गर्दै स्वेच्छा र रहरले कर तिर्ने वातावरण सिर्जना गर्नुपर्छ भन्ने नेपाली कांग्रेस पार्टीको ठहर रहेको उल्लेख गर्दै ज्ञापनपत्रमा सरकारी निकायमा हुने भ्रष्टाचार र अनियमितताको अन्त्य गरी जनताको आर्थिक स्तर उकास्ने, सेवासुविधा विस्तार गर्ने नीति ल्याउन समेत स्थानीय सरकारको ध्यानाकर्षण गराइएको छ ।
जनताका पीर मर्का समेटिएको नेपाली कांग्रेसको मागलाई सातदिनभित्र सम्बोधन नगरे चरणवद्ध आन्दोलनका कडा कार्यक्रम अघि बढाउन बाध्य हुने चेतावनी पनि ज्ञापनपत्रमा दिइएको छ ।
