इलाम।
नोबल कोरोना भाइरस (कोभिड १९) को विश्वका विभिन्न देशमा संक्रमण बढी रहेका बेला भारतले पूर्वी नाका पशुपतिनगर बन्द गरेपनि काँकरभिट्टा नाका खुल्ला नै रहेको छ । कोरोना भाइरसको कारण देखाउँदै भारतले पशुपति नाकाबाट सवारी साधन प्रवेशमा रोक लगाएको हो । भारतमा कोरोनाका कारण दुई जनाको मृत्यु भइसकेको छ ।
पश्चिमबंगाल सरकारले कोरोना नियन्त्रणका लागि भन्दै शनिबार बिहानबाट नाका बन्द गरेको हो । नेपालतर्फबाट भारत जाने र भारतबाट भित्रिनै सवारी साधन नाका बन्द भएपछि ठप्प रहेको पशुपतिनगरस्थित इलाका प्रहरी कार्यालयले जनाएको छ ।
नाका अनिश्चितकालका लागि बन्द गरेको जानकारी आफूहरुलाई प्राप्त भएको प्रहरी निरीक्षक रमेश राईले बताए । नाका बन्दभएपछि सवारी साधन ठप्प रहेको छ भने स्थानीयलाई आउ–जाउ गर्न दिइएको बताइएको छ ।
कोरोना नियन्त्रणकै लागि सूर्याेदय नगरपालिका, १ नम्बर प्रदेश र संघीय सरकारले पशुपतिनगरका २ स्थानमा हेल्प डेस्क राखेर मानिसको तापक्रम जाँच गरिरहेका छन् । २ वटा ‘थर्मल गन’ प्रयोग गरी दिनहुँ करिब ६ सय जनाको तापक्रम जाँच भइरहेको थियो ।
हेल्प डेस्कका लागि ६ जना स्वास्थ्यकर्मी परिचालन गरिएको छ । सूर्याेदय नगरपालिकाका स्वास्थ्य शाखा प्रमुख धनराज यादवले हेल्प डेस्कमा कसैमाथि कोरोनाको आशंका भए तत्काल तोकिएको स्थानमा पु¥याउन एम्बुलेन्ससमेत तयार रहेको जानकारी दिए । हालसम्म कसैलाई पनि कोरोनाको लक्षण नभेटिएको जनाइएको छ ।
नेपालले भारतसंगका सिमा नाकाहरुमा उच्च सर्तकता अप्नाउदैं हेल्प डेस्क मार्फत कोरोनाको परिक्षण गरिरहेको छ । यता झापाको कांकरभिट्टा स्थित हेल्प डेस्कमा पनि उच्च निगरानीका साथ कोरोनाको परिक्षण भइरहेको जनाइएको छ ।
बिहीबार मात्रै कांकरभिट्टाबाट दुई युक्रेनी नागरिकलाईफिर्ता पठाइएको थियो । उनीहरुमा उच्च तापक्रम देखिएपछि नेपाल प्रवेशमा रोक लगाइएको थियो । यसैबीच पूर्वी नाका काकरभिट्टामा कोरोनो सङ्क्रमणको ज्वरो नाप्ने ‘थर्मल गन’ पर्याप्त नहुँदा भीड व्यवस्थापनमा समस्या उत्पन्न भएको छ । पूर्वीनाका काँकडभिट्टाबाट भाइरस भित्रिन नदिन भारतबाट आउने सबै नागरिकलाई पंक्तिबद्धरूपमा ज्वरो नाप्ने व्यवस्था मिलाइएको छ ।
सीमाबाट आउने नेपाली तथा भारतीयको ज्वरो नाप्न एउटा मात्र ‘थर्मल गन’को मात्र भर पर्नुपरेकाले समस्या भएको हो । दैनिक हजारौँले ओहोरदोहोर गर्ने नाकामा कम्तीमा १० ‘थर्मल गन’ प्रयोग गरिए मात्र नाकामा जाँच व्यवस्थित हुने काँकडभिट्टा क्याम्पसका प्रमुख लक्ष्मीप्रसाद उप्रेती बताउँछन् । उनले भूटान, बङ्गलादेश, म्यान्मारजस्ता तेस्रो मुलुकसँग समेत नजिकको दूरी भएको नाका भएको हुँदा काँकडभिट्टामा जाँच प्रक्रियालाई सुव्यवस्थित, भरपर्दो र विश्वसनीय तुल्याउनुपर्ने बताएका छन् ।
मेचीनगर नगरपालिकाले सो भाइरसको सङ्क्रमण रोकथामका लागि काँकडभिट्टा नाकामै सचेतनामूलक कार्यक्रम राखेको थियो । कार्यक्रमका सहभागी अधिकांशले नाका जोखिमका दृष्टिले अति संवेदनशील क्षेत्र भएको हुँदा नाका बन्दको कदम चालेर जोखिम न्यूनीकरणको प्रयास गरिनुपर्ने धारणा राखेका थिए ।
