झापा ।
कोरोना भाइरसको संक्रमण तीब्र रुपमा फैलिरहेको समयमा देशभर मास्कको कालोबजारी भइरहेको पाइएको छ ।
बजारमा ५ रुपैयाँसम्ममा पाइने सर्जिकल मास्कलाई १७ रुपैयाँमा बिक्री गर्ने झापामा दुई जना पक्राउ परेका छन् । पक्राउ पर्नेमा झापा गाँउपालिका–४ का श्रवण माझी र अजिम अन्सारी रहेको प्रहरी कार्यालय झापाले जनाएको छ ।
पक्राउ परेका उनीहरुले मास्क राखिएको गोदाम र ठाँउ भने बताउन मानेनन् । तर, उनीहरु मास्कको १ हजार स्याम्पल लिएर बिर्तामोडमा आएपछि पत्रकारको सहयोगमा नियन्त्रणमा लिएको हो ।
पत्रकारले खरिदकर्ता बनेर डिल गर्दा उनीहरुले १० हजार पिस मास्क लिए १७ रुपैयाँसम्ममा दिन सक्ने बताएका थिए । उनीहरुको सम्पर्क भारतीय व्यापारीहरुसँग समेत देखिएको प्रहरीको भनाइ छ ।
