सङ्खुवासभा,
सङ्खुवासभाको मकालु गाउँपालिका–१ मा निर्माणाधीन इसुवाखोला हाइड्रोपावरले आयोजना पीडितलाई नौ करोड थप गरेको छ । हाइड्रोपावर कम्पनीले कीर्ते कागज बनाएर करोडाँै रकम अनियमितता गरेपछि स्थानीयवासी आन्दोलित भएका थिए । हाइड्रोपावरले कीर्ते कागज बनाएर ठगी गरेकोमा स्थानीयवासीले आपत्ति जनाएका थिए ।
मकालु गाउँपालिका–१ मा निर्माण गरिरहेको केविएनआर इसुवा हाइड्रोपावर लिमिटेडले स्थानीयवासीलाई प्रतिरोपनी रु तीन लाखका दरले थप गर्ने भएको वडाध्यक्ष वाङ्दीछिरिङ शेर्पाले जानकारी दिनुभयो ।
आयोजनाको नाम बेचेर जग्गाको अधिकतम प्रतिरोपनी रु दुई लाख मुआब्जा दिएर आठदेखि १० लाख मूल्य निर्धारण गरेको भेटिएपछि स्थानीयवासीले विरोध जनाएका थिए । आयोजनाले स्थानीयवासीलाई पाखोबारीको प्रतिरोपनी एक लाख ५० हजार र बारीको प्रतिरोपनी दुई लाख मुआब्जा दिएको थियो ।
इसुवा हाइड्रोपावर कम्पनी, स्थानीयवासी र मकालु–१ का वडाध्यक्ष शेर्पासहित बसेको बैठकले प्रतिरोपनी रु तीन लाख रकम थप गर्ने सहमति भएको हो । गत पुस १३ गते भएको सहमतिबाट प्रतिरोपनी रु तीन लाख थप गर्ने सहमति भएको वडाध्यक्ष शेर्पाको भनाइ छ ।
कम्पनीले स्थानीयवासीका जग्गा प्रतिआना एक लाखमा खरिद गरेको तर नक्कली कागजात बनाएर ३७ लाखसम्ममा खरिद गरेको देखाएर कम्पनीका नाममा करोडाँैको मूल्याङ्कन गरेको प्रमाण भेटिएको थियो ।
प्रतिरोपनी थप गरेको रु तीन लाखबाहेक बैठकले परियोजनाका लागि सडक निर्माण गर्दा प्रयोग हुने अन्य जग्गाबापत प्रतिरोपनी रु एक लाख थप गर्ने र यसअघि खरिद गरेको जग्गाको रकममा कट्टा गरेको पाँच प्रतिशत रकमसमेत फिर्ता गर्ने सहमति भएको पीडित कुसाङदोर्ची शेर्पाले बताउनुभयो ।
आयोजनाले पीडितलाई बैक खातामार्फत रकम भुक्तानी दिइने सहमतिमा उल्लेख छ । हाइड्रोपावर आयोजनाले करीब २५२ रोपनी जग्गा खरिद गरेको थियो । मकालु–१ मा ९७।२ मेघावाट क्षमताको विद्युत् उत्पादन गर्न इसुवाखोला हाइड्रोपावर केभिएनआर विराटनगर र बिगवल्र्ड हाइड्रोपावरले निर्माण गरिरहेका छन् ।
–––