झापा ।
नेपाली कांग्रेसले आसन्न १४औं महाधिवेशनका लागि ३८ जिल्लामा केन्द्रीय प्रतिनिधि पठाएको छ ।
भदौ १८ गतेदेखि हुने कांग्रेसको १४औं महाधिवेशनका लागि ३८ जिल्लामा केन्द्रीय प्रतिनिधि पठाएको हो । कांग्रेसको केन्द्रीय निर्वाचन समितिले शुक्रवार ३८ जिल्लामा निर्वाचन प्रतिनिधि तोकेको निर्वाचन समितिका सचिव जगन्नाथ श्रेष्ठले जानकारी दिए । कांग्रेसको सबै भन्दा तल्लो तह वडा तहको अधिवेशन १८ गतेका लागि निर्धारित छ ।
झापामा सुवोधवावु सिलवाल केन्द्रीय प्रतिनिधि तोकिएका छन् । साविक मेची अञ्चलका इलाम बाहेक तीन जिल्लामा केन्द्रीय प्रतिनिधि तोकिएका हुन् । ताप्लेजुङमा तिलक पाण्डे, पाँचथरमा मदन खड्का केन्द्रीय प्रतिनिधि तोकिएका हुन् । इलाममा भने पार्टीले केन्द्रीय प्रतिनिधि तोकेको छैन ।
निर्वाचन समितिका अनुसार समितिले तोकेका प्रतिनिधिहरुसँगै ति जिल्लाका क्रियाशील सदस्यताको सूची, निर्वाचन निर्देशिका र आवश्यक प्रशिक्षणसमेत दिइएको छ । ‘जिम्मेवारी पाउनु भएका प्रतिनिधिहरूलाई सम्बन्धित जिल्लाको क्रियाशील सदस्यताको सूची, निर्वाचन निर्देशिका र आवश्यक प्रशिक्षणसमेत दिइएको छ, केही अझै बुझ्ने क्रममा नै हुनुहुन्छ’– निर्वाचन समितिका सचिव श्रेष्ठले भने ।
कांग्रेसमा केही जिल्लाका सभापतिहरू भने सदस्यताको सूची सार्वजनिक गरिनुपर्ने माग गर्दै पार्टी केन्द्रीय कार्यालय सानेपामा रिले अनसनमा छन् । पार्टी नेतृत्वले भने जिल्ला सभापतिको माग नसुनी निर्वाचन प्रतिनिधि तोकेर सदस्यताको सूचीसहित प्रतिनिधि जिल्ला पठाएको हो
।
महाधिवेशन प्रक्रियामा देखिएको समस्या समाधान गर्न पहल
नेपाली कांग्रेसको संस्थापन इतर समूहले महाधिवेशन प्रक्रियामा देखिएको व्यावहारिक कठिनाइ समाधानका लागि पहल गर्ने भएको छ ।
पार्टीका पूर्वमहामन्त्री प्रकाशमान सिंहको निवास चाक्सीबारीमा शुक्रवार बसेको संस्थापन इतर समूहको बैठकले तोकिएकै मितिमा अधिवेशन गर्ने वातावरण बनाउन पार्टी सभापति एवम् प्रधानमन्त्री शेरबहादुर देउवासँग छलफल गर्ने निर्णय गरेको हो ।
बैठकपछि सञ्चाकर्मीसँग कुरा गर्दै काँग्रेस नेता डा मीनेन्द्र रिजालले महाधिवेशनका लागि देखिएको व्यावहारिक कठिनाइ समाधानका लागि पार्टीका वरिष्ठ नेता रामचन्द्र पौडेलले सभापति देउवासँग छलफल गर्ने जानकारी दिए ।
अधिवेशन प्रक्रियामा केही व्यवहारिक कठिनाइ आएका छन्, उक्त कठिनाइलाई समाधान गर्नुपर्छ, जिल्ला सभापतिले राखेका मागलाई समेत नेतृत्वले गम्भीररुपमा लिनुपर्छ– उनले भने । बैठकमा वरिष्ठ नेता पौडेल, महामन्त्री डा. शशाङ्क कोइराला, कोषाध्यक्ष सीतादेवी यादव, पूर्वमहामन्त्री सिंह, नेताहरु डा. रामशरण महत, अर्जुननरसिंह केसी, बलबहादुर केसी, डा. शेखर कोइराला, डा. रिजाललगायत उपस्थित थिए ।
