काठमाडौं ।
युक्रेनले यदि चीनले रुसलाई हतियार उपलब्ध गराए चीन द्वन्द्वको पक्षमा रहेको बुझिने बताएको छ ।
चीन–रुसका राष्ट्र प्रमुखबीच भेटवार्ता भइरहेका बेला युक्रेनका अधिकारीले चीनले रुसलाई सैन्य सहयोग गरे ऊ द्वन्द्वको पक्षमा रहेको बुझिने बताएका हुन् ।तर, चीनले रुसलाई सैन्य सहयोग नगर्ने विश्वास युक्रेनको छ ।
युक्रेनका राष्ट्रिय सुरक्षा तथा रक्षा परिषद्का सचिव ओलेक्सी डेनिलोवले भनेका छन्, “यदि चीनले रुसलाई खुला रूपमा हतियार उपलब्ध गराउने प्रक्रिया अगाडि बढायो भने ऊ द्वन्द्वको पक्षमा रहेको बुझिनेछ ।”
दुई दिने भ्रमणका लागि सोमबार मात्र चिनियाँ राष्ट्रपति सी जिङपिन मस्को पुगेका हुन् । सोमबार नै उनको रुसी समकक्षी भ्लादिमिर पुटिनसँग अनौपचारिक भेटवार्ता भइसकेको छ । दुई नेताबीच मंगलबार औपचारिक भेटवार्ता हुने र पत्रकार सम्मेलन गर्ने तय भएको छ ।
रुसले युक्रेनमा आक्रमण गरेपछि पहिलोपटक सी मस्को पुगेका हुन् । सीको भेटलाई महत्त्वका साथ हेरिएको छ । बीबीसीबाट
