विनोद सापकोटा
झापा,
साप्ताहिक र सार्वजनिक विदाका दिन पनि स्थानिय तहका जनप्रतिनिधि र कर्मचारी कार्यालयकै काममा व्यस्त हुन्छन् भन्ने धेरैलाई थाहा नहुन सक्छ । विदाका दिन कर्मचारीले परिवारका सदस्य संग दिन विताउने, बजार तथा आफन्त भेट्न जाने कार्यक्रम तय गरेका हुन्छन् । तर, शिवसताक्षी नगरका जनप्रतिनिधि कर्मचारीलाई विदाका दिन पनि एकैछिन फुर्सद हुदैन ।
नगरका कर्मचारी मात्र होइन । जनप्रतिनिधि पनि उस्तै व्यस्त हुन्छन् । खास गरेर नगर प्रमुख, उप प्रमुख, नगरका प्रमुख प्रशासकीय अधिकृत, योजना शाखाका प्राविधकले सरकारले दिएको सार्वजनिक र साप्ताहिक विदालाई पनि कार्यालयकै काममा समय दिने गरेका छन् ।
शनिवार विहान ७ बजे नगर उप प्रमुख नरमाया कार्की माईधार दोमुखा निर्माणाधिन कालोपत्रे सडकको अनुगमनमा थिइन् । उनका साथमा नगरका प्रमुख प्रशासकिय अधिकृत अमृतवहादुर राई, १० नम्बर वडा अध्यक्ष हर्कधन सिगु, ईन्जिनियर उत्तम बराल थिए ।
सडक अनुगमनमा निस्किएको टोलीलाई कतिपय स्थानियले ‘विदाका दिन पनि अनुगमन हुन्छ ?’ भनेर सोधेका थिए । ‘मतदाताले आफुलाई योग्य छानेर मत दिनुभएको छ । उहाँहरुकै मतले निर्वाचन जितेर यहाँ सम्म आएका हौं । आज विदा हो । जनताको काम गर्नुहुदैन भन्ने छैन । विदाका दिन पनि काम गर्यो भने एक दिन छिटो जनताका काम सकिन्छ,’ उपप्रमुख कार्कीले यसरी सहजै जवाफ दिँदा स्थानियले अचम्म मानेका थिए ।
अन्य विदाका दिन पनि शिवसताक्षी नगरपालिका प्रमुखदेखि उपप्रमुख र त्यहाँ कार्यरत कर्मचारीहरु योजनाको अनुगमनमा व्यस्त हुन्छन् । कतिपय कर्मचारी अघिल्लो दिनको बाँकी रहेको काम कार्यलयमा बसेर गरिरहेका हुन्छन् । शिवसताक्षी नगरमा जनप्रतिनिधि र कर्मचारीले अतिरिक्त काम गरेवापत पारिश्रमिक लिने गरेका छैनन् । जुनसुकै विदाका दिन कुनैपनि योजना को अनुगमन र कार्यालयको काम गरेबापत जनप्रतिनिधि र कर्मचारीले अतिरिक्त भत्ता पालिकाबाट नलिएको शिवसताक्षी नगरपालिकाले जनाएको छ ।
जनप्रतिनिधिले कोशी प्रदेश सरकारले तोकेको आर्थिक लगायतका अन्य सुविधा पालिकाबाट पाउँछन् । कर्मचारीले नेपाल सरकारले तोकेको पारिश्रमिक पाउने गरेका छन् । तर, विदाका दिन अनुगमन वा पालिकाको अन्य कुनै कार्यक्रममा सहभागि भए बापत जनप्रतिनिधिले पालिकाबाट आर्थिक सुविधा नलिने गरेको नगरका लेखा अधिकृत प्रकाश योङहाङले बताए ।
अनुगमन टोलीले शनिवार माईधार— दोमुखा रिङरोड, नुनमति दोमुखा झोलुङे पुल र स्विमिङ पुल र चिल्ङ«ेन पार्कको अनुगमन गरेको थियो । माईधार— दोमुखा कालोपत्रै सडक ४ करोड २४ लाख ८३ हजार २४५ मा निर्माण भएको हो । यो सडक ९५ प्रतिशत निर्माण सम्पन्न भएको इन्जिनियर उत्तम बरालले बताएका छन् ।
नगरको एउटै योजनामा चालु आर्थिक वर्षको सबैभन्दा धेरै बजेट विनियोजित भएको योजना माईधार — दोमुख कालोपत्रे सडक हो । यो सडकलाई नगरले नगर गौरवको योजनाका रुपमा अघि सारेको थियो । कालोपत्रे सडक निर्माण भएपछि झापाको दोमुखा आन्तरिक तथा वाहिय पर्यटकको पहिलो रोजाईमा पर्ने नगर प्रमुख मेघाहाङ थोप्राले बताए ।
सडकको शिलान्यास भएदेखि शनिवार सम्म नगर प्रमुख थोप्रा अनुगमनमा नपुगेको दिन सायदै विरलै होला । नगर प्रमुख थोप्राले भने, ‘नगरले ठिक समयमा निर्णय गरेकाले माइधार दोमुखा सडक कालोपत्रे अन्तिम चरणमा पुगेको छ । अव यो सडकले नगरलाई राम्रो प्रतिफल दिन सक्छ ।’ दोमुखा क्षेत्रबाट हाल संकलन भईरहेको नगर कर अब एक चौथाई वृद्धि हुने अनुमान नगर प्रमुखले गरेका छन् ।
आर्थिक वर्ष सकिन अव ३७ दिन मात्र बाँकी छ । संघ र प्रदेश सरकारले पठाएको सशर्त अनुदान र नगर स्तरिय कतिपय योजनाहरु सम्पन्न भईसकेका छन् । केही योजनाहरु निर्माणाधिन छन् । ति योजनाको अनुगमन तिव्र रुपमा भईरहेको नगरपालिकाका सूचना अधिकारी डिल्ली नेपालले बताए । उनका अनुसार असारको तेश्रो साता सम्ममा ९० प्रतिशत भन्दा बढी योजना सम्पन्न हुन्छन् ।
गुणस्तरीय निर्माणको काममा कसैसँग सम्झौता नहुने र यसको कार्यान्वयनको लागि अनुगमनलाई तिब्रता दिएको नगरको योजना शाखाले जनाएको छ । नगर संग भएको संझौता अनुसार समयमै हरेक योजना निर्माण सम्पन्न सक्न नगर प्रम्ुखु थोप्राले निर्माण प्रदायक कम्पनी संग अनुरोध गरेका छन् । उनले भने,‘ आँखा देखिने वेला अर्थात विहान सवेरै देखि साँझ सम्म योजनाको अनुगमन गर्न भ्याई नभ्याई छ ।’
