झापा ।
हाल अष्ट्रेलिया बस्दै आएका व्यवसायी तथा सामाजिक व्यक्तित्व दिनेशकुमार पोखरेलले गैर आवासीय नेपाली संघ (एन आर एन ए) को ओसेनिया क्षेत्रीय संयोजकमा सर्वसम्मत निर्वाचित भएका छन् ।
उनी झापाको कनकाई नगरपालिका १ दुर्गापुरका स्थायी वासिन्दा हुन् । एन आर एन ए अन्तर्राष्ट्रिय कार्य समिति अन्तर्गत अष्ट्रेलिया , न्यूजिलेण्ड, पपूवा न्यू गिनीसमेत देशहरूलाई समेटेर एन आर एन एमा ओसेनिया क्षेत्रको ओसेनिया क्षेत्रीय संयोजकको पद रहेको छ ।
विगतमा विभिन्न जिम्वमेवारीमा काम गरेको अनुभवका आधारमा पोखरेलले उक्त पदमा आफ्नो उम्मेद्वारी घोषणा गरेका थिए । आजबाट शुरु भएको गैरआवासीय नेपाली सङ्घ (एनआरएन) को विश्व सम्मेलन तथा ११औँ महाधिवेशनमा उनी सर्वसम्मत संयोजक बनेका हुन् । सन् २०२३ देखि २०२५ सम्म उनले संयोजकको जिम्मेवारी पाएका हुन् ।
पोखरेलले गैर आवासीय नेपाली संघ (एन आर एन ए) अष्ट्रेलियाको प्रवक्ता सन् २०१३–२०१५, एन आर एन ए अष्ट्रेलिया उपाध्यक्ष र न्यू साउथ वेल्स राज्य संयोजक २०१५–२०१७, नेपाल फेस्टिभल सिड्नी संयोजक२०१५–२०१७,, एन आर एन ए सोसियल वेलफेयर फण्ड संयोजक २०१७–२०१९, एन आर एन ए अष्ट्रेलिया सल्लाहकार २०१९–२०२१, को ज़िम्मेवारी सकुशल पूरा गरिसकेका छन् ।
उनी अन्तर्राष्ट्रिय झापाली समाजका संस्थापक अध्यक्ष तथा हाल संरक्षक समेत हुन् । नेपालमा एन आर एन ए मार्फत नेपालमा लगानी भित्र्याउन तथा विभिन्न सामाजिक अभियानमा पोखरेलले महत्वपूर्ण भूमिका निर्वाह गर्दै आएका छन् ।
