झापा ।
झापाको दमकमा जंगली हात्तीको आक्रमणबाट एक व्यक्तिको मृत्यु भएको छ।
दमक नगरपालिका–३ दिपज्योति टोलमा जंगलबाट आएको एउटा हात्तीले सोही ठाउँ बस्ने सुबिन भट्टराईको भान्सा घर भत्काउन लागेको थियो । छिमेकी ४५ वर्षीय मिनबहादुर भण्डारीले हात्ती धपाउन खोज्दा उनीमाथि आक्रमण गरेको थियो ।
सोही क्रममा सय मिटर परसम्म हात्तीले लखेटेर लछारपछार पारी उचालेर पछार्दा भण्डारीको घटनास्थलमै मृत्यु भएको जिल्ला प्रहरी कार्यालय झापाले जनाएको छ ।
इलाका प्रहरी कार्यालय दमकमा घटनाबारे जानकारी प्राप्त हुनासाथ प्रहरी टोली खटिएर अनुसन्धान कार्य जारी राखेको जिल्ला प्रहरी कार्यालयका प्रहरी नायव उपरीक्षक कृष्णकुमार चन्दले जानकारी दिए ।
