बिर्तामोड ।
बिर्तामोड उद्योग वाणिज्य संघका अध्यक्ष राजु न्यौपानेलाई मातृ शोक परेको छ । न्यौपानेकी आमा बिर्तामोड–४ निवासी ८६ वर्षीया पुष्पकला न्यौपानेको उपचारका क्रममा भारतको शिलगढीमा विहीबार राति निधन भएको हो ।
गत कात्तिक २७ गते हरिबोधनी एकादशीका दिन तुलसीको पूजा गर्दा दियोको आगो सल्किएर उनी घाइते भएकी थिइन् । उनलाई उपचारका लागि बिर्तासिटी अस्पताल बिर्तामोडमा भर्ना गरिएको थियो । त्यहाँ उपचार सम्भव नभएपछि भारतको शिलगढी लगिएको थियो ।
भारतमा पोष्टमार्टमको झञ्झटिलो प्रक्रिया पूरा गरी निधनको २४ घण्टापछि उनको शव शुक्रबार राति बिर्तामोड ल्याइएको थियो । शनिबार बिहान नेपालमा पनि पोष्टमार्टमको प्रक्रियापछि बिर्तामोडबाट शवयात्रासहित कनकाई माईमा पुष्पकलाको पार्थिव शरीरको अन्त्येष्टि गरिएको थियो । स्व. न्यौपानेका चार जना छोरा र तीन जना छोरी रहेका छन् ।
छोराहरुमा अजय, विजय, सञ्जय र राजु छन् । त्यस्तै छोरीहरुमा सरस्वती, सुशीला र शारदा रहेका छन् । स्व. पुष्पकलाका श्रीमानको शिवप्रसादको ०७२ सालमै निधन भएको थियो ।
