पूर्वाञ्चल दैनिक र म

यस ऐतिहासिक यात्रासँग मेरो व्यक्तिगत पत्रकारिता जीवन पनि गहिरो रूपमा जोडिएको छ। झापाको शिवसताक्षी–८ झिलझिलेलाई कर्मभूमि बनाएको म, पत्रकारितामा प्रवेश गरेको पहिलो दिनदेखि नै पूर्वाञ्चलको भूगोल, समाज, समस्या र सम्भावनाका कथाहरू कलममा उतार्दै आएको छु। दैनिक, स्वाधीन संवाद, विवेचना, जनसंसद, बज्रपात, प्रतिदिन, पूर्व सन्देश, पूर्वाञ्चल दैनिक, कञ्चनजङ्गा एफएम, सेतोपाटी लगायतका थुप्रै संचार माध्यममा लेख्ने अवसर पाएँ। सबैसँग आफ्नो–आफ्नै अनुशासन, पाठक वर्ग र चुनौती थिए। तर यिनैमध्ये पूर्वाञ्चल दैनिकसँगको सम्बन्ध भने विशिष्ट, आत्मीय र भावनात्मक रह्यो।

पूर्वाञ्चल दैनिकसँगको मेरो नाता केवल पत्रकार र पत्रिकाको सम्बन्धमा सीमित छैन—यो साझेदारीको यात्रा हो। पत्रिकाले मलाई स्थानीय यथार्थ बुझ्न, विश्लेषण गर्न र अभिव्यक्त हुन आवश्यक मञ्च दियो; मैले पनि सकेसम्म यसको मूल्य अभ्यास गर्ने गरी तथ्य, सत्य र विवेचनामा आधारित सामग्रीहरू दिएँ। स्थानीय राजनीति, शिक्षा, स्वास्थ्य, आर्थिक गतिविधि, सांस्कृतिक विविधता, विपद्को अवस्था, जनजीवनका संघर्ष र आशाका कथाहरू—यी सबै विषयमा कलम चलाउँदै जाँदा मेरो पत्रकारिता पनि समयसँगै निखरिँदै गयो।

पूर्वाञ्चल दैनिकको सबैभन्दा ठूलो पहिचान भनेकै स्थानीय मुद्दालाई प्राथमिकता दिने परम्परा हो। यही कारण मेरा लेख–समाचार यहाँ प्रकाशित हुँदा समुदायबाट प्रत्यक्ष प्रतिक्रिया पाइन्थ्यो। कतिपय सामग्रीले स्थानीय तहदेखि प्रशासन र राजनीतिमा आवश्यक बहस उठाउँदा पत्रकारिताको प्रभाव र दायित्व कति गम्भीर हुन्छ भन्ने कुरा अझ स्पष्ट हुन्थ्यो। यही कारण पूर्वाञ्चल दैनिक अरू मञ्चभन्दा अलग उभिन्छ—प्रभावकारी, व्यावहारिक र समुदायसँग जोडिएको पत्रकारिताको नमुना बनेर।

>

तीन दशकमा देशले ठूलो राजनीतिक उतार–चढाव देख्यो। सामाजिक संरचना बदलियो, प्रविधि तीव्र गतिमा अगाडि बढ्यो, पत्रकारितामा प्रतिस्पर्धा र चुनौती दुवै बढे। धेरै पत्रिका रास्ताबाट हराउँदै गए, धेरैले निरन्तरता कायम राख्न सकेनन्। तर पूर्वाञ्चल दैनिक टिकिरह्यो—किनकि यसको मूल शक्तिअनुसार यो केवल व्यवसायिक प्रकाशन नभई समुदायप्रतिको उत्तरदायित्व र सामाजिक दायित्व बोक्ने माध्यम हो।

३१ वर्षे यात्राको साक्षी बनेर, म आफ्नो पत्रकारिता जीवनका धेरै अध्यायहरू सम्झन्छु—पहिलोपटक छापिएको समाचारको उत्साह, आलोचनाबाट सिकेका पाठ, रातभर खटेर तयार गरेको विशेष रिपोर्ट, चुनावी मैदानको धूलो, विद्यालय–अस्पतालका कमजोरीहरू, जनताको गुनासा, विकासका सम्भावना अनि कहिलेकाहीँ जोखिमपूर्ण स्थितिमा गरिएको रिपोर्टिङ—यी सबैमा पूर्वाञ्चल दैनिकको पृष्ठभूमि र भरोसा सधैं साथ रह्यो।

आज पनि म जब कुनै विषयमा कलम चलाउन बस्छु, मनमा पहिलो प्रश्न उठ्छ—के यो सामग्री सत्य, तथ्य र पाठकप्रति इमानदार छ? यही नै पत्रकारिताको आत्मा हो। पूर्वाञ्चल दैनिकले दिएको मञ्चले यही चेतना निरन्तर जागृत गराइरहन्छ।

अन्त्यमा, पूर्वाञ्चल दैनिक ३१ वर्षमा प्रवेश गरिरहेको यस विशेष अवसरमा म हार्दिक शुभकामना व्यक्त गर्दछु। पत्रिकाले विगतजस्तै भविष्यमा पनि सत्य, तथ्य र जिम्मेवारीपूर्ण पत्रकारिताको बाटो पछ्याउँदै देश–समाजका मुद्दालाई वस्तुनिष्ठ रूपमा उजागर गरिरहोस्।

पूर्वाञ्चल दैनिक र मेरो कलमको यात्रा अझ प्रेरक, अर्थपूर्ण र जनताको आवाजलाई धार दिने माध्यम बन्न रहिरहोस्—यही सदिच्छा।