सुन्दरहरैंचा (मोरङ),
पूर्वेली लोकसंगीतको मिठास बोकेर उदाउँदै गरेका प्रतिभाशाली नवगायक दिलिप लिम्बू आफ्नो सांगीतिक यात्राको पहिलो महत्वपूर्ण खुड्किलो चढ्ने तयारीमा छन्। मोरङको केराबारीमा जन्मिएर हाल सुन्दरहरैंचा–गोठगाउँमा बसोबास गर्दै आएका लिम्बू एकैपटक दुईवटा गीतका म्युजिक भिडियोमार्फत दर्शक–श्रोतामाझ आउँदैछन्।
नयाँ भए पनि संगीतप्रतिको गहिरो लगाव, मेहनत र आत्मविश्वासले भरिएका लिम्बुले पूर्वेली लोकसंस्कृतिको झल्को दिने दुई गीत— “लैजाउला हङकङ सहरमा” र “मुलघाटैको पुलमा”— तयार पारेका छन्। हाल दुवै गीतका म्युजिक भिडियोहरू सम्पादन (इडिटिङ) को अन्तिम चरणमा रहेका छन्।
यी गीतहरूमा नवगायक दिलिप लिम्बूसँगै चर्चित गायिका सुनिता थेगिमको सुमधुर स्वरले विशेष आकर्षण थपेको छ। “लैजाउला हङकङ सहरमा” गीतमा साधना कुलुङ राईको शब्द, रुद्र श्रेष्ठको संगीत रहेको छ भने भिडियोमा दिलिप लिम्बु र पवित्र तिलिङ मादेन लिम्बूको अभिनय देख्न सकिनेछ।
त्यसैगरी, “मुलघाटैको पुलमा” गीतमा गजेन्द्र राईको शब्द र कृष्ण भक्त राईको संगीत रहेको छ। यस गीतको भिडियोमा पनि दिलिप लिम्बू र पवित्र तिलिङ मादेन लिम्बूले अभिनय गरेका छन्।
गीतहरूको छायांकन पूर्वका सुन्दर तथा सांस्कृतिक महत्व बोकेका स्थानहरू—तेह्रथुमको तीनजुरे, धरानको श्रम संस्कृति पार्क र मोरङकै केराबारी—मा गरिएको छ, जसले भिडियोहरूलाई अझ जीवन्त र आकर्षक बनाउने विश्वास गरिएको छ।
आगामी नयाँ वर्ष २०८३ साल बैशाख १ गते, यी दुवै गीतहरू सार्वजनिक गरिने तयारी गरिएको छ। एउटा गीत दिलिप लिम्बुको आफ्नै युट्युब च्यानेलबाट र अर्को राम कैलास थापा युट्युब च्यानेलमार्फत रिलिज गरिनेछ। गायक लिम्बुले भने, “यो मेरो लागि एउटा सपना साकार हुने सुरुवात हो। दर्शक–श्रोताबाट माया, साथ र सुझावको अपेक्षा गरेको छु।”
उनको यो प्रयास केवल दुई गीत सार्वजनिक गर्नु मात्र नभई, पूर्वेली लोकसंस्कृतिको संरक्षण र प्रवर्द्धनमा पनि महत्वपूर्ण योगदान बन्ने अपेक्षा गरिएको छ। सीमित अवसरका बाबजुद पनि ठूलो सपना बोकेर अघि बढिरहेका दिलिप लिम्बुको यो पाइला धेरै नवप्रतिभाका लागि प्रेरणाको स्रोत बन्न सक्छ।
अब प्रतीक्षा छ—नयाँ वर्षसँगै आउने यी गीतहरूले दर्शक–श्रोताको मन कत्तिको जित्नेछन्। तर यति निश्चित छ, दिलिप लिम्बुको यो सुरुवातले उनको उज्ज्वल सांगीतिक भविष्यको संकेत दिइसकेको छ।
