झापा।
झापाको अर्जुनधारा–९ देवर्षि टोलमा २०३१ सालबाट सञ्चालनमा रहेको बाटो केही व्यक्तिले रिसइबीका कारण बन्द गर्दा स्थानीय समस्यामा परेको बताइएको छ ।
०३१ सालबाट सञ्चालनमा रहे पनि स्थानीय इन्द्रसिंह बस्नेत, हेम बस्नेत पूर्ण बस्नेत र खड्ग सापकोटाले गत वर्षदेखि बन्द गरेका कारण आफूहरुलाई आवतजावतमा समस्या भएको स्थानीयको भनाइ छ ।
सोही ठाँउ निवासी अम्बर कार्कीसंग जग्गा विवाद भएपछि मुद्दा चलिरहेको र अनावश्यक रुपमा विवाद खडा गरेर सञ्चालनमा रहेको बाटो बन्द गरेर आफूलाई दुःख दिएको कार्कीले बताए ।
उनले न्यायका लागि पटक–पटक वडा कार्यालय र नगरपालिकालाई जानकारी गराए पनि सम्बन्धित निकायले बाटो खुलाउन कुनै चासो नदिएको कार्कीले गुनासो गरे । यसैबीच मानवअधिकार सञ्जालले उक्त घटनाप्रति चासो ब्यक्त गरेको छ । सञ्जालका झापा अध्यक्ष विष्णु खरेलले स्थलगत रुपमा अध्ययन गरेको र बाटो बन्द गर्नु गैरकानूनी काम भएको बताएका छन् ।
बाटो बन्दका कारण प्रभावित भएका १९ परिवारका स्थानीयसहित सञ्जालले बिहीबार आयोजना गरेको पत्रकार सम्मेलनमा बोल्दै अध्यक्ष खरेलले न्याय सम्पादन गर्ने निकायले गैरजिम्मेवारीपन देखाएको आरोप लगाए ।
त्यस्तै स्थानीय सामाजिक अगुवा सागर ढकालले बाटो बन्द गर्नु अमानवीय व्यवहार भएको भन्दै कार्की र बस्नेत परिवारको मुद्दाको विषयलाई लिएर सार्वजनिक बाटो अवरोध गर्न नहुने बताए । चुनावका समयमा स्थानीय तहका नेताहरु भोट माग्दै सोही बाटो हिँडे पनि अहिले बाटो खुलाउन कुनै पहल गरेको भन्दै स्थानीयले आक्रोश व्यक्त गरेका छन् ।
पत्रकार सम्मेलनमा बोल्दै शान्ति समिति अर्जुनधाराका पूर्व संयोजक समेत रहेका केदारमान बस्नेतले दुई परिवारको जग्गा विवादले सार्वजनिक बाटो बन्द गर्नु गलत भएको बताएका छन् ।
उनले बाटो खुलाउने विषयमा सरोकारबाला निकायले चासो नदिएमा बाटो बन्द गर्नेहरुलाई कानूनी कठघरामा उभ्याउनु पर्ने बताए । त्यस्तै स्थानीय दुर्गा ढकालले बाटो तत्काल खोल्ने विषयमा स्थानीय तह, राजनीतिक दल र मानव अधिकारवादी संघ–संस्थालाई पहल गरिदिन अनुरोध गरेका छन् ।
यसैबीच उक्त स्थानमा बाटो नभएको भन्दै बन्द गरिरहेको अवस्थामा वडा कार्यालयले भने बाटोसहितको चार किल्ला गरेको फेला परेको छ । वडाध्यक्ष पुष्पकुमार प्रसाईंले बाटो अवरोध भएको विषय थाह भएको बताएका छन् । बाटो अवरोधको विषयमा जानकार रहे पनि खुलाउने विषयमा भने वडाध्यक्षले चासो नदिएको पाइएको छ ।
