रामप्रसाद ढुंगेल
झापा,
झापाली समाज युएईले कोरोना प्रभावित आफना आजीवन सदस्य तथा सदस्यका परिवारलाई प्रोत्साहन प्याकेज वितरण गरेको छ ।
वैदेशिक रोजगारीको लागि युएईमा रहेका झापालीहरुको सामाजिक संस्था झापाली समाज युएईले आफना करिब ४ सय आजीवन सदस्य तथा तिनका परिवारलाई झापा जिल्लाभित्र कोरोना पोजेटिभ भएको जानकारी पाएमा प्रोत्साहन प्याकेजका रूपमा सेनिटाइजर, साबुन, मास्क, डाबर च्यवनप्रास लगायतका सामग्रीहरु घरमै पुगेर हस्तान्तरण गर्ने योजना ल्याएको हो ।
झापाली समाज युएईका अध्यक्ष दुर्योधन कार्की र समाजको नेपाल सम्पर्क समितिका मेचीनगर इन्चार्ज बलराम अर्यालले जेठ ६ गते मेचीनगर नगरपालिका-५ स्थित आजीवन सदस्य नारायण भट्टराईको घरमा कोरोना प्रभावित ५ जना सदस्यलाई प्रोत्साहन प्याकेज वितरण गरेको छ ।
यसैगरी कोरोना प्रभावित आजीवन सदस्य सुनम भट्टराई र तेजमणि सुवेदीको परिवारलाई पनि जेठ ५ गते केन्द्रीय अध्यक्ष कार्की र नेसस सचिव सुवेदीको उपस्थितिमा प्रोत्साहन प्याकेज वितरण गरिएको थियो ।
प्रोत्साहन प्याकेज पाएर आत्मबल बढेकाे लाभान्वित परिवारले प्रतिक्रिया दिएको वितरणमा सहभागी अध्यक्ष कार्कीले बताएका छन् ।
निषेधाज्ञाको समयमा स्थानीय जनप्रतिनिधिहरुको समन्वयमा अन्य सदस्यहरु र निजका परिवारहरुलाई पनि प्रोत्साहन प्याकेज वितरण गरिमे झापाली समाज युएईका नेपाल सम्पर्क समिति अध्यक्ष दुर्गेस सापकोटाले बताएका छन् ।
नेपाल सम्पर्क समिति सचिव मणि सुवेदीले आफना सदस्य वा सदस्यका परिवार कोरोनाबाट प्रभावित भएको खण्डमा झापाका १५ वटै पालिकामा रहेका इन्चार्जहरुलाई सम्पर्क गर्न अनुरोध गरेका छन् ।
नेपालमा स्वास्थ संकट आएको प्रतिकुल अवस्थामा झापाली समाज युएईले शुरूवात गरेको यो अनुकरणीय कामको सबैले सिको गर्नुपर्ने अन्तर्राष्ट्रिय झापाली समाजका अध्यक्ष छत्र सुब्बाले प्रतिक्रिया दिएका छन् । अन्तर्राष्ट्रिय झापाली समाजमा आबद्द झापाली समाज युएई आफना रचनात्मक कामहरुले अग्रपंक्तिमा रहेको अध्यक्ष सुब्बाले दाबी गरेका छन् ।
जिल्ला प्रसाशन कार्यालयमा सामाजिक संस्थाको रूपमा दर्ता भएको झापाली समाज युएईको सुरुङ्गामा कार्यालय रहेको छ ।
आजिवन सदस्य उत्थान कोष र असहाय बालबालिका छात्रवृत्ति कोष गरेर जम्मा २३ लाख रुपैयाँ पुजी झापाका बैंकमा मुद्ती खातामा राखेर झापाली समाज युएईले सहयोगका कामहरुलाई निरन्तरता दिइरहेको छ ।
