‘विश्व अटिजम सचेतना दिवस’ मनाइयो

२० चैत्र २०८०, मंगलवार मा प्रकाशित

बिर्तामोड ।

अप्रिल २ अर्थात् ‘विश्व अटिजम सचेतना दिवस’ बिर्तामोडमा मनाइएको छ । न्याय र विकासका लागि सामाजिक सञ्जाल (एसएनजेडी)को संयोजनमा सचेतना दिवस मनाइएको हो । अटिजमबारे सचेतना जगाउने र यसको बारेमा अधिकतम् मानिसहरुमा जानकारी दिने उद्देश्यले ¥यालीसहितको कार्यक्रम आयोजना गरिएको एसएनजेडीका कार्यक्रम संयोजक कुमार चुडालले जानकारी दिए ।

हनुमान कम्प्लेक्सबाट शुरु भएको र्याली वान स्टप मलबाट पूर्वमा पुरानो इलाका प्रहरी कार्यालयबाट पुनः हनुमान कम्प्लेक्स अगाडि आएर कोणसभामा परिणत भएको थियो । ¥यालीमा करिब एक सय ५० जना सहभागी थिए ।

कोणसभालाई सम्बोधन गर्दै बिर्तामोड नगरपालिकाका उपप्रमुख नगेन्द्रप्रसाद संग्रौलाले अटिजम कुनै रोग नभई मस्तिष्क विकासको एउटा अवस्था भएको भन्दै सानै उमेरमा यसको पहिचान गर्न सके थेरापीको माध्यमबाट उनीहरुको जीवनयापनमा सहजता ल्याउन सकिने बताए ।

बालबालिकाको पढ्न पाउने अधिकारको सम्मान गर्दै बिर्तामोड नगरपालिकाले बिर्ताबजारस्थित महेन्द्र रत्न माविमा अटिजम स्रोत कक्षा सरोकारवाला निकायसँग समन्वय गरि सञ्चालन गरिरहेको उनले बताए । उनले उक्त स्रोत कक्षाको स्तरवृद्धिका लागि पालिकाले थप सहयोग गर्ने प्रतिबद्धता समेत व्यक्त गरे । ¥यालीमा सहभागीहरुलाई अटिजमको बारेमा अधिकतम् प्रचार गर्न उनले आग्रह गरे ।

एसएनजेडीका कार्यक्रम संयोजक चुडालले धेरै अभिभावकहरुले अटिजमको बारेमा थाहा नपाउँदा बालबालिकाको अवस्था जटिल बनिरहेको बताए । सानै उमेरमा अटिजमको बारेमा जानकारी पाएमा विभिन्न थेरापीको माध्यमबाट उनीहरुको जीवनयापनमा सहजता ल्याउन सकिने भन्दै यसको व्यापक प्रचारप्रसारको आवश्यकता रहेको उनले बताए ।

कार्यक्रममा सहभागी इकम कलेज, मनकामना कलेज, आदर्श स्कुल अफ होटल म्यानेजेमेन्टका विद्यार्थी तथा विद्यालयका प्रतिनिधि लगायत सम्पूर्ण सहभागीहरुलाई उनले धन्यवाद दिए । कार्यक्रममा सहभागीहरुले विभिन्न नारा लेखिएको प्लेकार्ड तथा व्यानर प्रदर्शन गरेका थिए । अभिभावकहरुले अटिजमको थिम तथा नारा उल्लेखित टीसर्ट लगाएका थिए ।

कार्यक्रममा अटिजम भएका बालबालिका, अभिभावक, विभिन्न संघ–संस्थाका प्रतिनिधि, कलेजका विद्यार्थीहरुको उपस्थिती रहेको थियो । त्यस्तै एसएनजेडीले सञ्चालन गरिरहेको प्यारेन्ट चाइल्ड ट्रेनिङ सेन्टर र महेन्द्र रत्न माविको अटिजम स्रोत कक्षामा भएका बालबालिका तथा अभिभावकहरु बीच सचेतना कार्यक्रम समेत सम्पन्न गरेको छ ।

अटिजम भएका बालबालिका तथा अभिभावकहरुले विभिन्न नारा र सचेतना लेखिएको प्ले कार्ड प्रदर्शन तथा अटिजमको थिम निलो रङ भएको क्याण्डल बालेको एसएनजेडीका कार्यक्रम अधिकृत रञ्जन धमलाले जानकारी दिए । यो महिनाभर अटिजम सचेतनामूलक विभिन्न पोष्टर तथा पर्चाहरु समेत वितरण गरिने धमलाले बताए ।

प्रतिकृया व्यक्त गर्नुहोस् ।

LEAVE A REPLY

Please enter your comment!
Please enter your name here