अर्जुनधारा।
झापाको अर्जुनधारा–४ भाङबारीस्थित विन्ध्यवासिनी सिंहदेवी मन्दिरमा यज्ञशाला निर्माण हुने भएको छ ।
विश्व शान्ति तथा समृद्धि, आपसी सद्भाव र धार्मिक सहिष्णुताको कामनासहित आइतबारदेखि शुरु भएको शतचण्ढी हवनात्मक नवाह महायज्ञको अवसरमा दाता बिर्तामोड निवासी झुमादेवी बस्नेतले उक्त यज्ञशाला निर्माण गर्ने भएकी हुन् ।
मन्दिर व्यवस्थापन समितिका अध्यक्ष मनोज जोशीको अध्यक्षतामा आयोजित महायज्ञ उद्घाटन कार्यक्रमकी प्रमुख अतिथि समेत रहेकी दाता बस्नेतले यज्ञशाला निर्माणस्थलमा भूमिपुजन गरेकी थिइन् ।
तत्काल निर्माण कार्य शुरु हुने उक्त यज्ञशाला २० फिट लम्बाई र २० फिट चौडाईको क्षेत्रफलमा निर्माण हुने मन्दिर व्यवस्थापन समितिका अध्यक्ष जोशीले बताए । अर्जुनधारा जलेश्वर धामका मूल अर्चक अग्निप्रसाद सिग्देलको प्रमुख आचार्यत्वमा सञ्चालन हुने महायज्ञ यही चैत २४ गतेसम्म सञ्चालन हुने बताइएको छ ।
कार्यक्रममा अर्जुनधारा–४का वडाध्यक्ष अम्बरबहादुर कटुवाल, खुदुनाबारी–अर्जुनधारा खानेपानी तथा सरसफाई उपभोक्ता समितिका अध्यक्ष केदारनाथ पराजुली, अर्जुनधारा जलेश्वर धाम व्यवस्थापन समितिका अध्यक्ष नविन गट्टानी, वरिष्ठ सदस्य चित्रसेन भण्डारीलगायतको सहभागिता रहेको थियो ।
