बिराटनगर,
इलामको फाकफोकथुम गाउपालिका वडा नम्बर ३ सल्लेरी बस्ने वर्ष २५ को उमेश गिरी श्रीमती हराएको निवेदन लिएर प्रहरी चौकी पुगे। चैत्र १ गते मेरो श्रीमती वर्ष १९ की बिमला कट्टेल हराएको छ खोजि गरी पाउ भनि प्रहरी चौकी आमचोकमा हुलिया निवेदन दिएर फर्किए। हुलिया निबेदन प्राप्त गरेपछि प्रहरी चौकी आमचोकले जिल्ला प्रहरी कार्यालय इलाममा निज महिलाको खोजतलासको लागि परीपत्र पनि गर्यो।
जिल्ला प्रहरी कार्यालय इलामले हराएको महिलाको सम्बन्धमा बिशेष अनुसन्धान टोली गठन गरी खोजतलास गर्ने क्रममा बिमला कट्टेललाई कर्तव्य गरी मारेको खुल्न आएपछि तत्काल जिल्ला प्रहरी कार्यालय इलामबाट प्रहरी निरीक्षक रमेश राईको कमाण्ड बिशेष अनुसन्धान टोलि खटिई श्रीमती हराएको भनि निवेदन दिने अभियुक्त श्रीमान उमेश गिरीलाई पक्राउ गरेको पत्रकार सम्मेलन गरी प्रहरीले जानकारी दिएको छ।
इलामका प्रमुख एसपी एकनारायण कोइरालाका अनुसार अभियुक्तले फागुन २९ गते राति ११:५० बजे श्रीमतीको हत्या गरी फाकफोकथुम गाउँपालिका वडा नम्बर २ धार्ने खोप स्थित दाहाल गोलाईमा खाल्डो खनि गाडेको छु भनि बयान दिएको बताए।
गर्भवती अवस्थाकी श्रीमतीलाई एक्स्काभेटर चालक उमेशले श्रीमती बिमलालाई घुम्न जाऔं भनेर धार्नेखोप पुर्याएको प्रहरी अनुसन्धानबाट खुल्न आएको छ । उनले मुक्का प्रहार गरी लडाएर घाँटी थिचेर हत्या गरेपछि एक्स्काभेटरले नै खाल्डो खनेर गाडेको जिल्ला प्रहरी कार्यालय इलामका प्रवक्ता संजिव बोगटीले जानकारी दिए ।
प्रहरी टोलीले चैत्र १५ गते बिहानको राति ०१:०० बजेको समयमा शव गाडेको ठाउँबाट उत्खनन् गरी शवलाई बाहिर निकाली पोस्टमार्टमको लागि वीपी कोइराला स्वास्थ्य बिज्ञान प्रतिष्ठान धरान सुनसरी पठाईएको प्रवक्ता बोगटीले बताए।
पक्राउ परेका अभियुक्तलाई कर्तव्य ज्यान सम्बन्धी कसुरमा चैत १५ गतेबाट लागु हुने गरी म्याद थपको लागि आइतबार जिल्ला अदालतमा उपस्थित ७ दिनको म्यादथप अनुमति प्राप्त भई थप अनुसन्धान कार्य भईरहेको जिल्ला प्रहरी कार्यालय इलामले जनाएको छ ।
