झापा, प्रतिनिधिसभा निर्वाचनलाई विशेष प्राथमिकतामा राख्दै जिल्ला प्रहरी कार्यालय झापाको कमाण्ड सम्हालेकी नयाँ प्रहरी उपरीक्षक -एसपी बसुन्धरा खड्काले मातहतका प्रहरीलाई कडा र स्पष्ट निर्देशन दिएकी छन् ।
शान्तिपूर्ण, निष्पक्ष र भयमुक्त वातावरणमा निर्वाचन सम्पन्न गराउनु आफ्नो पहिलो दायित्व भएको उल्लेख गर्दै उनले सुरक्षामा कुनै पनि किसिमको लापरबाही नहुने चेतावनी दिएकी छन् ।
सरुवा भएर गएका एसपी राजन लिम्बूको विदाइ तथा नयाँ एसपी खड्काको स्वागत कार्यक्रमका क्रममा बोल्दै उनले निर्वाचन लक्षित सुरक्षा योजना तत्काल कार्यान्वयनमा ल्याउन निर्देशन दिएको एक प्रहरी अधिकारीले बताए । उनका अनुसार एसपी खड्काले जिल्लाभरका प्रहरी युनिटको नियमित अनुगमन गर्ने, फाँटगत गतिविधि प्रत्यक्ष बुझ्ने र आवश्यक परे कठोर निर्णय लिन पछि नपर्ने स्पष्ट सन्देश दिएकी छन् ।
गृह मन्त्रालयले निर्वाचन सुरक्षालाई केन्द्रमा राखेर खड्कालाई झापामा पठाएको हो । उनी बाग्मती प्रदेश प्रहरी कार्यालय मानव स्रोत व्यवस्थापन महाशाखा, हेटौडाबाट सरुवा भई झापा आएकी हुन् । आइतवार गृह मन्त्रालयले ४८ जना एसपीको एकैपटक सरुवा गरेको थियो । यसै क्रममा झापाका एसपी राजन लिम्बू मानव बेचबिखन अनुसन्धान ब्युरो, अनुसन्धान व्यवस्थापन शाखा काठमाडौँ सरुवा भएका छन् ।
झापा आइपुगे लगत्तै दमक पुगेर सुरक्षा अवस्थाबारे जानकारी
झापा आइपुगे लगत्तै एसपी खड्काले दमक क्षेत्रको सुरक्षा अवस्थाबारे प्रत्यक्ष जानकारी लिएकी छन् । उच्च जनघनत्व र राजनीतिक गतिविधि बाक्लो रहने दमकलाई निर्वाचन सुरक्षाको दृष्टिले संवेदनशील क्षेत्रका रूपमा लिँदै उनले स्थानीय प्रहरी नेतृत्वसँग समन्वय बैठक गर्दै सम्भावित चुनौती र आवश्यक तयारीबारे निर्देशन दिएकी थिइन् ।
प्रहरी स्रोतका अनुसार दमक, बिर्तामोड र मेचीनगर क्षेत्रलाई ‘विशेष निगरानी क्षेत्र’ का रूपमा राखेर सुरक्षा रणनीति बनाइँदैछ । निर्वाचन अवधिमा गस्ती, चेकजाँच र सूचनात्मक संयन्त्रलाई थप सक्रिय बनाइने छ ।
झापा–५ मा उच्च प्रोफाइल प्रतिस्पर्धा, सुरक्षा चुनौती बढ्दो
यसपटक झापा–५ निर्वाचन क्षेत्र विशेष चर्चामा छ । पूर्व प्रधानमन्त्री तथा एमाले अध्यक्ष केपी शर्मा ओली, रास्वपाका वरिष्ठ नेता बालेन्द्र शाहसहितका उच्च प्रोफाइल उम्मेदवारको प्रतिस्पर्धाले यहाँको चुनावी माहोल निकै तातिएको छ । ठूला दल, स्वतन्त्र र नयाँ शक्तिको भिडन्तले चुनावलाई राजनीतिक रूपमा मात्र होइन, सुरक्षाका दृष्टिले पनि संवेदनशील बनाएको छ ।
यही पृष्ठभूमिमा एसपी परिवर्तनलाई गृह मन्त्रालयले रणनीतिक कदमका रूपमा हेरेको छ । नयाँ नेतृत्वसहित जिल्लाको सुरक्षा संयन्त्रलाई चुस्त बनाउँदै कुनै पनि अवाञ्छित गतिविधि हुन नदिने लक्ष्य लिइएको छ ।
‘निर्वाचन नै पहिलो प्राथमिकता’
एसपी खड्काले आफू नयाँ भएकाले मातहतका प्रहरीसँग प्रतिदिन संवाद गर्दै जिल्लाको वस्तुस्थिति बुझिरहेको बताएकी छन् । “निर्वाचन सफल नभएसम्म शान्ति सुरक्षा नै पहिलो प्राथमिकता हो,” उनले स्पष्ट निर्देशन दिँदै भनेकी छन् ।
झापा–५ को प्रतिस्पर्धात्मक चुनाव, बढ्दो राजनीतिक चहलपहल र संवेदनशील क्षेत्रको अवस्थालाई मध्यनजर गर्दै नयाँ एसपीको आगमनसँगै जिल्लाको सुरक्षा संयन्त्र थप सक्रिय र कडा बन्ने संकेत देखिएको छ ।
