सुन्दरहरैंचा (मोरङ) मोरङको केराबारी मा जन्मिएर हाल सुन्दरहरैंचा–७ गोठगाउँ बस्दै आएका नवगायक दिलीप लिम्बू आफ्नो जीवनको ठूलो सपना पूरा गर्ने संघारमा पुगेका छन्। लामो समयदेखि मनमा साँचेर राखेको सांगीतिक चाहनालाई वास्तविकतामा रूपान्तरण गर्दै उनले पहिलो कोशेलीस्वरूप दुई वटा पुर्बेली गीत सार्वजनिक गर्ने तयारी गरेका हुन्।
उनका अनुसार पहिलो गीत “मुलघाटै पुल” र दोस्रो गीत “लैजाउला हंङकङ्ग” श्रोतामाझ ल्याइनेछ। दुवै गीतमा उनको साथमा गायिका सुनिता थेगिम को स्वर पनि मिसिएको छ, जसले गीतलाई थप भावनात्मक र सजीव बनाउने विश्वास गरिएको छ। 
सानैदेखि गीत–संगीतप्रति मोह राख्ने लिम्बूका लागि यो अवसर केवल गीत सार्वजनिक गर्नु मात्र नभई आफ्नो पहिचान बनाउने संघर्षपूर्ण यात्राको सुरुवात पनि हो। उनी भन्छन्, “संगीत मेरो सपना मात्र होइन, मेरो आत्मा हो। धेरै वर्षदेखि मनमा बसेको रहर आज पूरा हुँदैछ। पुर्बेली भाकाको मिठास र हाम्रो माटोको सुगन्ध दर्शक–श्रोतासम्म पुर्याउन पाउँदा निकै भावुक बनेको छु। सबैले साथ दिनुहुनेछ भन्ने आशा राखेको छु।”
गीतको रेकर्डिङ र म्युजिक भिडियो छायांकन कार्य अन्तिम चरणमा पुगेको छ। विशेषगरी “लैजाउला हंङकङ्ग” गीतले परदेशिएको मन, छुट्टिएको माया र आशाको कथा बोल्नेछ, जसले वैदेशिक जीवन बिताइरहेका धेरै नेपालीको भावना समेट्ने विश्वास गरिएको छ। शीर्षकमा उल्लेखित हङकङ्ग प्रतीकात्मक रूपमा परदेशको पीडा र सपनाको संगम झल्काउने बताइएको छ।
स्थानीय परिवेशबाटै सुरु भएको यो सांगीतिक यात्रा अब राष्ट्रिय स्तरमा पहिचान बनाउने लक्ष्यसहित अघि बढिरहेको छ। पहिलो प्रस्तुति सार्वजनिक हुनुअघि नै उनका गीतप्रति संगीतप्रेमीहरूमा उत्सुकता र अपेक्षा बढ्दै गएको छ—जसले देखाउँछ, एउटा नयाँ स्वर जन्मिँदैछ, जसले भोलिका दिनमा पुर्बेली संगीतलाई नयाँ उचाइ दिन सक्छ।
